മംഗളൂരു: സംഘപരിവാര് സംഘടകളെ തീവ്രവാദ പ്രസ്ഥാനങ്ങളായി പ്രഖ്യാപിക്കണമെന്നാവശ്യപ്പെട്ട് കര്ണാടക ആഭ്യന്തര മന്ത്രി പ്രയങ്ക് ഖാര്ഗെക്കും കേന്ദ്ര ആഭ്യന്തര മന്ത്രി അമിത്ഷാക്കും കത്തയച്ച് മുന് ആര്എസ്എസ് പ്രവര്ത്തകന്. ആര്എസ്എസ്, വിശ്വ ഹിന്ദു പരിഷത്ത്, ബജറംഗ് ദള് ആടക്കമുള്ള സംഘടനകള്ക്കെതിരെയാണ് കത്തയച്ചത്. മുൻ ആർഎസ്എസ് പ്രചാരകനായ യശ്വന്ത് സഹദേവ് ഷിൻഡെയാണ് കത്തയച്ചത്.
2000-കളിൽ രാജ്യത്തിന്റെ വിവിധ ഭാഗങ്ങളിൽ നടന്ന ബോംബ് സ്ഫോടനങ്ങളിൽ ആർഎസ്എസ് മേധാവി മോഹൻ ഭാഗവത്, ആർഎസ്എസ് നേതാവ് ഇന്ദ്രേഷ് കുമാർ, വിഎച്ച്പി ജനറൽ സെക്രട്ടറി മിലിന്ദ് പരൻഡെ തുടങ്ങിയ മുതിർന്ന നേതാക്കൾക്ക് പങ്കുണ്ടായിരുന്നുവെന്നാണ് ഷിൻഡെയുടെ ആരോപണം. ഇവർക്കെതിരെ അന്വേഷണം നടത്തി അറസ്റ്റ് ചെയ്യണമെന്നും കത്തിൽ ആവശ്യപ്പെട്ടതായി റിപ്പോർട്ടിൽ പറയുന്നു.
2000-കളിൽ നടന്ന വിവിധ സ്ഫോടനങ്ങളിൽ ഹിന്ദുത്വ തീവ്രവലതുപക്ഷ സംഘടനകൾക്ക് പങ്കുണ്ടെന്ന ആരോപണം ഷിൻഡെ വർഷങ്ങളായി ഉന്നയിക്കുന്നുണ്ട്. എന്നാൽ, ഈ കേസുകളിൽ അന്വേഷണ ഏജൻസികളും കോടതികളും നടപടികൾ സ്വീകരിച്ചിട്ടുണ്ടെന്നും ഒടുവിൽ പല കേസുകളിലും പ്രതികളെ വെറുതെവിട്ടിട്ടുണ്ടെന്നും റിപ്പോർട്ടിൽ ചൂണ്ടിക്കാട്ടുന്നു.
1990 മുതൽ ആർഎസ്എസ് പ്രവർത്തകനായിരുന്ന ഷിൻഡെ, ബോംബ് നിർമാണ പരിശീലന സംഘത്തിൽ ചേരാൻ ആവശ്യപ്പെട്ടതിനെ തുടർന്നാണ് സംഘടനയിൽ നിന്ന് വിട്ടതെന്നാണ് അദ്ദേഹത്തിന്റെ അവകാശവാദം. രാജ്യത്തിന്റെ വിവിധ ഭാഗങ്ങളിൽ ബോംബ് സ്ഫോടനങ്ങൾ നടത്താൻ ആർഎസ്എസ്, വിഎച്ച്പി പ്രവർത്തകർ ആസൂത്രണം നടത്തിയ യോഗങ്ങളിൽ താൻ പങ്കെടുത്തിരുന്നുവെന്നും അദ്ദേഹം ആരോപിച്ചിട്ടുണ്ട്.
2022 ഓഗസ്റ്റിൽ മഹാരാഷ്ട്രയിലെ നാന്ദേഡിലെ പ്രത്യേക സിബിഐ കോടതിയിൽ സമർപ്പിച്ച സത്യവാങ്മൂലത്തിലും ഷിൻഡെ സമാന ആരോപണങ്ങൾ ഉന്നയിച്ചിരുന്നു. 2003ൽ മിലിന്ദ് പരൻഡെയുടെ മേൽനോട്ടത്തിൽ ഇരുപതോളം പേർക്കൊപ്പം ബോംബ് നിർമാണത്തിൽ പരിശീലനം ലഭിച്ചുവെന്നും അദ്ദേഹം സത്യവാങ്മൂലത്തിൽ ആരോപിച്ചതായി റിപ്പോർട്ടുണ്ട്.
2006 ഏപ്രിലിൽ നാന്ദേഡിൽ നടന്ന സ്ഫോടനവുമായി ബന്ധപ്പെട്ട കേസിന്റെ ഭാഗമായാണ് സത്യവാങ്മൂലം സമർപ്പിച്ചത്. സ്ഫോടനത്തിൽ നരേഷ് രാജ്കൊണ്ട്വാറും വിഎച്ച്പി പ്രവർത്തകനെന്ന് പറയപ്പെടുന്ന ഹിമാൻഷു പാൻസെയും കൊല്ലപ്പെട്ടിരുന്നു. ഔറംഗാബാദിലെ ഒരു പള്ളി ലക്ഷ്യമിട്ട് നടത്താനിരുന്ന സ്ഫോടനത്തിനായുള്ള ബോംബ് നിർമാണത്തിനിടെയാണ് സംഭവം നടന്നതെന്നാണ് സിബിഐയുടെ നിലപാട്.
ഈ കേസിൽ സാക്ഷിയാകാൻ ഷിൻഡെ അപേക്ഷ നൽകിയിരുന്നെങ്കിലും പിന്നീട് അപേക്ഷ തള്ളപ്പെട്ടു. 2025 ജനുവരി നാലിന് കേസിലെ ജീവിച്ചിരുന്ന ഒമ്പത് പ്രതികളെയും നാന്ദേഡ് വിചാരണക്കോടതി വെറുതെവിട്ടിരുന്നു.
പാകിസ്താനിൽ രഹസ്യ ദൗത്യങ്ങൾക്കും ഇന്ത്യയിൽ ബോംബ് സ്ഫോടനങ്ങൾ നടത്തുന്നതിനുമായി തനിക്ക് പരിശീലനം ലഭിച്ചിരുന്നുവെന്നും ഷിൻഡെ ആരോപിച്ചിട്ടുണ്ടെന്ന് ‘ദി വയർ’ റിപ്പോർട്ട് ചെയ്യുന്നു. 2003-04 കാലയളവിൽ ജൽന, പൂർണ, പർഭണി എന്നിവിടങ്ങളിലെ പള്ളികളിൽ നടന്ന സ്ഫോടനങ്ങളിലും തനിക്കൊപ്പം പരിശീലനം നേടിയവർക്ക് പങ്കുണ്ടായിരുന്നുവെന്നും അദ്ദേഹം ആരോപിച്ചിരുന്നു.
കർണാടക ആഭ്യന്തര മന്ത്രി പ്രിയങ്ക് ഖാർഗെയ്ക്ക് നൽകിയ കത്തിൽ, കോടതിയിൽ നേരത്തെ ഉന്നയിച്ച ആരോപണങ്ങൾ ഷിൻഡെ ആവർത്തിച്ചതായാണ് റിപ്പോർട്ട്. അജ്മീർ ദർഗ സ്ഫോടനം, 2008ലെ മലേഗാവ് സ്ഫോടനക്കേസ് തുടങ്ങിയ സംഭവങ്ങളുമായി ബന്ധപ്പെട്ടും അദ്ദേഹം ആരോപണങ്ങൾ ഉന്നയിച്ചിട്ടുണ്ട്.
പൊഖ്റാൻ ആണവപരീക്ഷണം, കാർഗിൽ യുദ്ധം, 2002ലെ ഗുജറാത്ത് കലാപം, 2019ലെ പുൽവാമ ആക്രമണം, ആർട്ടിക്കിൾ 370 റദ്ദാക്കൽ തുടങ്ങിയ വിഷയങ്ങളിലും ബിജെപി, ആർഎസ്എസ് നേതാക്കൾക്കെതിരെ ഷിൻഡെ ആരോപണങ്ങൾ ഉന്നയിച്ചതായി റിപ്പോർട്ടിൽ പറയുന്നു.
അതേസമയം, ഷിൻഡെ ഉന്നയിച്ച ആരോപണങ്ങൾ അദ്ദേഹത്തിന്റെ അവകാശവാദങ്ങളാണ്. ആരോപണങ്ങൾ സംബന്ധിച്ച ഔദ്യോഗിക അന്വേഷണങ്ങളുടെയും കോടതിവിധികളുടെയും പശ്ചാത്തലവും പ്രത്യേകം പരിഗണിക്കേണ്ടതുണ്ട്.
