ന്യൂഡൽഹി: പ്രതിപക്ഷം ഉന്നയിക്കുന്ന എല്ലാ വിഷയങ്ങളിലും ചർച്ചയ്ക്ക് തയ്യാറാണെന്ന് കേന്ദ്ര ആഭ്യന്തര മന്ത്രി അമിത് ഷാ. പാർലമെന്റിന് പുറത്ത് മാധ്യമങ്ങളോട് സംസാരിക്കവെയാണ് അമിത് ഷാ ഇക്കാര്യം വ്യക്തമാക്കിയത്. നീറ്റ് പ്രതിഷേധവുമായി ബന്ധപ്പെട്ട വിഷയത്തിലും ചർച്ചയ്ക്ക് സർക്കാർ തയ്യാറാണെന്നും അദ്ദേഹം പറഞ്ഞു.
ചർച്ച വേണമോ വേണ്ടയോ എന്ന കാര്യം പ്രതിപക്ഷം സ്പീക്കറെ അറിയിക്കണമെന്ന് അമിത് ഷാ ആവശ്യപ്പെട്ടു. ഇന്ന് ഉച്ചയ്ക്ക് ശേഷം മുതൽ നാളെ വരെയും ചർച്ച നടത്താൻ തയ്യാറാണെന്നും അദ്ദേഹം വ്യക്തമാക്കി. പാർലമെന്റിൽ താൻ തുടക്കം മുതൽ എത്തിയിരുന്നെന്നും തന്റെ ചേംബറിൽ ഉണ്ടായിരുന്നെന്നും അമിത് ഷാ പറഞ്ഞു. എന്നാൽ പ്രതിപക്ഷം ഇരു സഭകളും പ്രവർത്തിക്കാൻ അനുവദിക്കുന്നില്ലെന്നും അദ്ദേഹം ആരോപിച്ചു.
പാർലമെന്റിൽ ഉന്നയിക്കുന്ന ഏത് ചോദ്യത്തിനും മറുപടി നൽകാൻ തയ്യാറാണെന്നും സർക്കാരിന് ഒളിച്ചുവയ്ക്കാൻ ഒന്നുമില്ലെന്നും അമിത് ഷാ പറഞ്ഞു. എൻഡിഎ സർക്കാർ ഏത് വിഷയത്തിലും ചർച്ചയ്ക്ക് തയ്യാറാണെന്നും അദ്ദേഹം വ്യക്തമാക്കി.
അതേസമയം, അമിത് ഷായുടെ പ്രതികരണത്തിന് പിന്നാലെ ലോക്സഭാ പ്രതിപക്ഷ നേതാവ് രാഹുൽ ഗാന്ധി രംഗത്തെത്തി. അമിത് ഷായുടെ പ്രസംഗമല്ല, വിദ്യാർഥികൾക്കെതിരായ പൊലീസ് നടപടിയിൽ വ്യക്തമായ മറുപടിയാണ് വേണ്ടതെന്ന് രാഹുൽ ഗാന്ധി പറഞ്ഞു.
വിദ്യാർഥികൾക്കെതിരെ പൊലീസ് നടത്തിയ നടപടിയെക്കുറിച്ചും ലാത്തിച്ചാർജിനെക്കുറിച്ചും ഉത്തരവാദിത്തം ആർക്കാണെന്ന് വ്യക്തമാക്കണമെന്നും രാഹുൽ ആവശ്യപ്പെട്ടു. വിഷയത്തിൽ ആഭ്യന്തര മന്ത്രി നേരിട്ട് മറുപടി പറയണമെന്നും അദ്ദേഹം പറഞ്ഞു.




