ജർമനി വീണ്ടും ചുവപ്പണിയുകയാണോ എന്ന ചോദ്യമുയർത്തിക്കൊണ്ട് ബെർലിൻ സ്റ്റേറ്റ് തെരഞ്ഞെടുപ്പിൽ ഇടതുപക്ഷ പാർട്ടി കൈവരിച്ച മിന്നുന്ന വിജയമാണ് ഈ ദിവസങ്ങളിൽ ആഗോള രാഷ്ട്രീയത്തിലെ പ്രധാന വാർത്തകളിലൊന്ന്. ചാൻസലർ ഫ്രെഡ്രിക് മെർസിന്റെ ഭരണത്തിലുള്ള കൺസർവേറ്റീവ് ക്രിസ്ത്യൻ ഡെമോക്രാറ്റുകളെ (സി ഡി യു) രണ്ടാം സ്ഥാനത്തേക്ക് പിന്തള്ളിയാണ് ഡീലിങ്ക് പാർട്ടി (ലെഫ്റ്റ്) ഈ വൻ വിജയം സ്വന്തമാക്കിയത്. ജർമനിയുടെ പുനരേകീകരണത്തിന് ശേഷം ബെർലിനിൽ ഈ പാർട്ടിയിൽ നിന്ന് ആദ്യമായി ഒരു മേയർ അധികാരത്തിൽ വന്നേക്കാം എന്ന പ്രത്യേകതയും ഈ നിർണായക തിരഞ്ഞെടുപ്പ് ഫലത്തിനുണ്ട്.
ഈ ചരിത്ര വിജയത്തോടെ ജർമനിയിലെ കുടിയേറ്റക്കാരും സാധാരണക്കാരായ ജനങ്ങളും വലിയ പ്രതീക്ഷയിലാണ്. ബെർലിന്റെ ചരിത്രത്തിലാദ്യമായാണ് കുടിയേറ്റ പശ്ചാത്തലമുള്ള വ്യക്തിയോ ഒരു ഇടതുപക്ഷ നേതാവോ മേയർപദവിയിലേക്ക് എത്താൻ വഴിയൊരുങ്ങുന്നത്. ബെർലിനിലെ 36 ലക്ഷത്തോളം വരുന്ന ജനസംഖ്യയിൽ പകുതിയോളവും തുർക്കി, അറബ് പശ്ചാത്തലത്തിൽ നിന്നുള്ള കുടിയേറ്റക്കാരാണ്. മാത്രവുമല്ല, യൂറോപ്പിലെ ഏറ്റവും വലിയ പലസ്തീൻ പ്രവാസ സമൂഹമുള്ള നഗരം കൂടിയാണ് ബെർലിൻ. ജർമൻ സർക്കാരിന്റെ തീവ്ര ഇസ്രയേലി അനുകൂല നിലപാടുകൾ കാരണം പലസ്തീൻ ഐക്യദാർഢ്യ ശബ്ദങ്ങളെ തീവ്രവാദമായി മുദ്രകുത്തി അടിച്ചമർത്തുന്ന നിലവിലെ സാഹചര്യത്തിൽ ഈ ഇടതുപക്ഷ മുന്നേറ്റത്തിന് വലിയ രാഷ്ട്രീയ പ്രാധാന്യമുണ്ട്.
ജർമനിയിൽ ശക്തിപ്പെടുന്ന സാമ്പത്തിക മാന്ദ്യവും ജനങ്ങൾക്കിടയിലുള്ള അരക്ഷിതാവസ്ഥയുമാണ് തെരഞ്ഞെടുപ്പ് ഫലങ്ങളെ പ്രധാനമായും സ്വാധീനിച്ച ഘടകങ്ങൾ. നഗരത്തിൽ ഉയർന്നുവരുന്ന ഭവന നിർമാണ ചെലവുകളും കുതിച്ചുയരുന്ന വാടകവർധനവുമാണ് ഇടതുപക്ഷം പ്രധാന തെരഞ്ഞെടുപ്പ് പ്രചാരണ വിഷയമാക്കിയത്. ഇതിന് പരിഹാരമായി നഗരത്തിലെ വലിയൊരു പങ്ക് ഭവന സമുച്ചയങ്ങൾ ദേശസാത്കരിക്കുമെന്ന തങ്ങളുടെ പ്രധാന വാഗ്ദാനം നടപ്പിലാക്കുമെന്ന് വിജയാഹ്ലാദത്തിനിടയിൽ പാർട്ടിയുടെ ലീഡ് സ്ഥാനാർത്ഥി എലിഫ് എറാൽപ്പ് വ്യക്തമാക്കുകയുണ്ടായി. തെരഞ്ഞെടുപ്പിൽ 25.3 ശതമാനം വോട്ടുകൾ നേടിയാണ് ഡീലിങ്ക് പാർട്ടി ഒന്നാം സ്ഥാനത്തെത്തിയത്. എന്നാൽ 19 ശതമാനം വോട്ടുകൾ മാത്രമാണ് സി ഡി യുവിന് നേടാനായത്. അതേസമയം ഫാർ-റൈറ്റ് പാർട്ടിയായ ‘ആൾട്ടർനേറ്റീവ് ഫോർ ജർമനി’ (എഎഫ്ഡി) 16 ശതമാനം വോട്ടുകൾ നേടിയപ്പോൾ, സെന്റർ-ലെഫ്റ്റ് സോഷ്യൽ ഡെമോക്രാറ്റുകൾക്ക് (എസ് പി ഡി) 12.1 ശതമാനം വോട്ടുകൾ കൊണ്ട് തൃപ്തിപ്പെടേണ്ടി വന്നു.
തുർക്കി സ്വദേശികളുടെ മകളായ 45-കാരി എലിഫ് എറാൽപ്പ്, വൻകിട വാടക നിരക്കുകളാണ് ബെർലിനിലെ ഏറ്റവും വലിയ സാമൂഹിക പ്രശ്നമെന്ന് വിശ്വസിക്കുന്ന നേതാവാണ്. 2021-ൽ നടന്ന ഹിതപരിശോധനയുടെ അടിസ്ഥാനത്തിൽ ഏകദേശം 2,20,000 ഭവന യൂണിറ്റുകൾ സർക്കാർ ഉടമസ്ഥതയിലാക്കാനുള്ള നടപടികളുമായി മുന്നോട്ട് പോകുമെന്ന് അവർ ഉറപ്പിച്ചുപറയുന്നു. അതേസമയം, സഭയിൽ ഭൂരിപക്ഷം തികയ്ക്കുന്നതിനായി ഡീലിങ്ക് പാർട്ടിയുമായി സഖ്യമുണ്ടാക്കാൻ എസ് പി ഡിയും ഗ്രീൻ പാർട്ടിയും നിലവിൽ സന്നദ്ധത പ്രകടിപ്പിച്ചിട്ടുണ്ട്.
എന്നാൽ ഇതിന് തൊട്ടുമുമ്പ്, കിഴക്കൻ ജർമൻ സംസ്ഥാനമായ മെക്ലൻബർഗ്-ഫോർപോമേൻ നിയമസഭയിലേക്ക് നടന്ന തിരഞ്ഞെടുപ്പിൽ തീവ്ര വലതുപക്ഷ പാർട്ടിയായ ആൾട്ടർനേറ്റീവ് ഫോർ ജർമനി (എഎഫ്ഡി) ഏറ്റവും വലിയ ഒറ്റക്കക്ഷിയായത് വലിയ രാഷ്ട്രീയ ചർച്ചയായിരുന്നു. സെപ്റ്റംബർ 20-ന് നടന്ന തിരഞ്ഞെടുപ്പിന്റെ പ്രാഥമിക ഫലത്തിൽ എഎഫ്ഡി 38.2 ശതമാനം വോട്ട് നേടിയപ്പോൾ, ഭരണകക്ഷിയായ സോഷ്യൽ ഡെമോക്രാറ്റിക് പാർട്ടി (എസ്പിഡി) 35.5 ശതമാനം വോട്ടുമായി രണ്ടാം സ്ഥാനത്തേക്ക് തള്ളപ്പെടുകയായിരുന്നു.
ഈ തിരഞ്ഞെടുപ്പുകൾ സംസ്ഥാനതലത്തിൽ നടന്നതായതുകൊണ്ട് തന്നെ ജർമനിയിലെ വീസ, താമസാനുമതി, വിദേശികളുടെ തൊഴിൽ സംബന്ധമായ പ്രധാന നിയമങ്ങൾ എന്നിവയിൽ നേരിട്ട് പെട്ടെന്ന് മാറ്റങ്ങളുണ്ടാകില്ല. കാരണം ഇത്തരം വിഷയങ്ങൾ പ്രധാനമായും ഫെഡറൽ (കേന്ദ്ര) നിയമങ്ങളുടെ പരിധിയിലാണ് വരുന്നത്. എന്നാൽ സംസ്ഥാനതലത്തിൽ കുടിയേറ്റം, വിദ്യാഭ്യാസം, തൊഴിൽ, സാമൂഹിക സേവനങ്ങൾ തുടങ്ങിയ മേഖലകളിലെ രാഷ്ട്രീയ ചർച്ചകളെയും നയരൂപീകരണത്തെയും സ്വാധീനിക്കാൻ ഈ ഫലങ്ങൾക്ക് സാധിക്കും.
സംസ്ഥാന തിരഞ്ഞെടുപ്പുകളിൽ വലിയ മുന്നേറ്റം നടത്തിയതിന് പിന്നാലെ, ജർമനിയുടെ ഫെഡറൽ ഭരണത്തിൽ (കേന്ദ്രത്തിൽ) സ്വാധീനം ഉറപ്പിക്കാനുള്ള തന്ത്രപരമായ നീക്കങ്ങൾ എഎഫ്ഡി ഇപ്പോൾ ശക്തമാക്കിയിട്ടുണ്ട്. ജർമനിയിലുള്ള മലയാളി സമൂഹത്തെ സംബന്ധിച്ചിടത്തോളം ഈ വലതുപക്ഷ നീക്കങ്ങൾ ഏറെ നിർണായകമാണ്. നിലവിലുള്ള ഇരട്ടപ്പൗരത്വ നിയമം റദ്ദാക്കാൻ എഎഫ്ഡി ചെലുത്തുന്ന സമ്മർദ്ദം അവിടെ ജോലി ചെയ്തുവരുന്ന പ്രവാസികളുടെ ഭാവി പ്ലാനുകളെ പ്രതികൂലമായി ബാധിച്ചേക്കാം. എങ്കിലും ഒരു രഹസ്യ രേഖ പുറത്തുവന്നു എന്നതുകൊണ്ട് മാത്രം പെട്ടെന്ന് നിയമങ്ങളിൽ മാറ്റമൊന്നും ഉണ്ടാകില്ല. ജർമൻ ഭരണഘടനയും നിലവിലെ മറ്റ് മുഖ്യധാരാ രാഷ്ട്രീയ പാർട്ടികളും കുടിയേറ്റ വിരുദ്ധ തീവ്ര നിലപാടുകളെ ശക്തമായി എതിർക്കുന്നുണ്ട് എന്നതും ശ്രദ്ധേയമാണ്. അതേസമയം, നിയമപരമായ വീസയും തൊഴിൽ രേഖകളും കൃത്യമായി സൂക്ഷിക്കാനും അർഹതയില്ലാത്ത സോഷ്യൽ വെൽഫെയർ ആനുകൂല്യങ്ങൾ കൈപ്പറ്റാതിരിക്കാനും പ്രവാസികൾ പ്രത്യേകം ശ്രദ്ധിക്കേണ്ടതുണ്ട്.




