പാലക്കാട്: അട്ടപ്പാടിയിൽ പൊലീസ് നടത്തിയ പരിശോധനയിൽ 7,300 കഞ്ചാവ് ചെടികൾ കണ്ടെത്തി നശിപ്പിച്ചു. പുതൂർ പഞ്ചായത്തിലെ പൊന്നക്കൽ മലയിലാണ് രണ്ട് സ്ഥലങ്ങളിലായി കഞ്ചാവ് കൃഷി കണ്ടെത്തിയത്.

ചെങ്കുത്തായ മലകളിലൂടെ ഏഴ് മണിക്കൂറിലധികം യാത്ര ചെയ്താണ് പൊലീസ് സംഘം കൃഷിയിടങ്ങളിൽ എത്തിയത്. പൊന്നക്കൽ മലയ്ക്കും അംഗണ്യൻ ചോലയ്ക്കും ഇടയിലായി 160 തടങ്ങളിലായി ഒന്നര മാസം പ്രായമായ ഏകദേശം 1,600 കഞ്ചാവ് തൈകൾ കണ്ടെത്തി.

പൊന്നക്കൽ മലയുടെ കിഴക്കുഭാഗത്ത് 475 തടങ്ങളിലായി പൂർണ വളർച്ചയെത്തി പൂത്തുനിൽക്കുന്ന 5,700 കഞ്ചാവ് ചെടികളും കണ്ടെത്തി. ഇവയെല്ലാം പൊലീസ് നശിപ്പിച്ചു. ട്രിപ്പ് ഇറിഗേഷൻ സംവിധാനം ഉപയോഗിച്ചാണ് കഞ്ചാവ് ചെടികൾക്ക് വെള്ളം എത്തിച്ചിരുന്നത്. കഞ്ചാവ് കൃഷി നടത്തിയവരെ കണ്ടെത്തുന്നതിനായി പുതൂർ പൊലീസ് അന്വേഷണം ശക്തമാക്കി.