തൃശൂർ: ഹോസ്റ്റൽ ഫീസ് അടച്ചില്ലെന്ന കാരണത്താൽ ഒന്നാം വർഷ ബി.വി.എസ്.സി വിദ്യാർത്ഥികളുടെ പരീക്ഷാ ഫലം തടഞ്ഞുവെച്ചു. മണ്ണുത്തി വെറ്ററിനറി കോളേജിലാണ് സംഭവം. സംഭവത്തിൽ കോളേജിൽ വിദ്യാർഥികളുടെ പ്രതിഷേധമാണ്. കോഴ്‌സിലെ 175 വിദ്യാർഥികളുടെ പരീക്ഷാഫലമാണ് കോളേജ് അധികൃതർ പ്രസിദ്ധീകരിക്കാതെ തടഞ്ഞുവെച്ചിരിക്കുന്നതെന്നാണ് വിദ്യാർഥികളുടെ ആരോപണം.

ആകെയുള്ള വിദ്യാർഥികളിൽ 46 പേരുടെ ഫലം മാത്രമാണ് ഇതുവരെ പ്രസിദ്ധീകരിച്ചത്. ഹോസ്റ്റൽ ഫീസ് അടച്ചിട്ടില്ലെന്ന കാരണത്താൽ പരീക്ഷാഫലം തടഞ്ഞുവെച്ച നടപടി അനാവശ്യമാണെന്ന് ആരോപിച്ചാണ് വിദ്യാർഥികൾ പ്രതിഷേധവുമായി രംഗത്തെത്തിയത്.

എത്രയും വേഗം മുഴുവൻ വിദ്യാർഥികളുടെയും പരീക്ഷാഫലം പ്രസിദ്ധീകരിക്കണമെന്നാണ് വിദ്യാർഥികളുടെ ആവശ്യം. അധികൃതർ നടപടി സ്വീകരിച്ചില്ലെങ്കിൽ സമരം കൂടുതൽ ശക്തമാക്കുമെന്നും വിദ്യാർഥികൾ അറിയിച്ചു.