തിരുവനന്തപുരം: 18-ാമത് അന്താരാഷ്ട്ര ഡോക്യുമെന്ററി, ഹ്രസ്വചിത്ര മേള (IDSFFK) ഇന്ന് (സെപ്റ്റംബർ 30) സമാപിക്കും. വൈകുന്നേരം ആറിന് തിരുവനന്തപുരം കൈരളി തിയേറ്ററിൽ നടക്കുന്ന സമാപന സമ്മേളനം മുഖ്യമന്ത്രി വി.ഡി. സതീശൻ ഉദ്ഘാടനം ചെയ്യും. മന്ത്രി പി.സി. വിഷ്ണുനാഥ് അധ്യക്ഷത വഹിക്കും.
സാംസ്കാരിക കാര്യ വകുപ്പ് സ്പെഷ്യൽ സെക്രട്ടറി എം. അഞ്ജന സ്വാഗതം ആശംസിക്കും. ഫെസ്റ്റിവൽ ഡയറക്ടറും കെ.എസ്.സി.എ ചെയർപേഴ്സനുമായ രവീന്ദ്രൻ ആമുഖ പ്രഭാഷണം നടത്തും. ചലച്ചിത്രപ്രവർത്തക നിന സബ്നാനിക്ക് ലൈഫ് ടൈം അച്ചീവ്മെന്റ് അവാർഡ് മുഖ്യമന്ത്രി സമ്മാനിക്കും.
ഫിക്ഷൻ വിഭാഗത്തിലെ ജൂറി റിപ്പോർട്ടും പുരസ്കാര പ്രഖ്യാപനവും ജൂറി ചെയർപേഴ്സൺ സഞ്ജു സുരേന്ദ്രൻ നിർവഹിക്കും. ഫിക്ഷൻ വിഭാഗത്തിലെ പുരസ്കാരങ്ങൾ മുഖ്യമന്ത്രി വിതരണം ചെയ്യും. ഗതാഗത വകുപ്പ് മന്ത്രി സി.പി. ജോൺ ജൂറി അംഗങ്ങൾക്ക് ഉപഹാരം നൽകും.
നോൺ ഫിക്ഷൻ വിഭാഗത്തിലെ ജൂറി റിപ്പോർട്ടും പുരസ്കാര പ്രഖ്യാപനവും ജൂറി ചെയർപേഴ്സൺ റുചിർ ജോഷി നടത്തും. നോൺ ഫിക്ഷൻ വിഭാഗത്തിലെ പുരസ്കാരങ്ങൾക്കൊപ്പം മികച്ച ലോങ് ഡോക്യുമെന്ററി എഡിറ്റിങ്ങിനുള്ള കുമാർ ടാക്കീസ് അവാർഡും ഡോക്യുമെന്ററി ഛായാഗ്രഹണത്തിനുള്ള ശശി ആനന്ദ് മെമ്മോറിയൽ അവാർഡും മുഖ്യമന്ത്രി സമ്മാനിക്കും. നോൺ ഫിക്ഷൻ ജൂറി അംഗങ്ങൾക്കുള്ള ഉപഹാരം മേയർ വി.വി. രാജേഷ് നൽകും.
മന്ത്രി സി.പി. ജോൺ, കെ.എസ്.എഫ്.ഡി.സി ചെയർമാൻ പ്രേംകുമാർ, കേരള സ്റ്റേറ്റ് കൾച്ചറൽ ആക്ടിവിസ്റ്റ്സ് വെൽഫെയർ ഫണ്ട് ബോർഡ് ചെയർമാൻ എം. രഞ്ജിത്ത്, സാംസ്കാരിക കാര്യ വകുപ്പ് ഡയറക്ടർ കെ. ഇമ്പശേഖർ എന്നിവർ ചടങ്ങിൽ പങ്കെടുക്കും. ചലച്ചിത്ര അക്കാദമി സെക്രട്ടറി ഇൻ ചാർജ് സജിത് സി.സി നന്ദി രേഖപ്പെടുത്തും.
