സൈബീരിയയിലെ പ്ലേഗ് ഗവേഷണ ലബോറട്ടറിയിലെ ലാബ് ടെക്നീഷ്യൻ മരിച്ചതിന് പിന്നാലെ റഷ്യയിൽ പ്ലേഗ് ആശങ്ക. രോഗപ്രതിരോധ നടപടികളുടെ ഭാഗമായി നൂറുകണക്കിന് പേരെ ക്വാറന്റീനിലാക്കിയിരുന്നു. അഞ്ച് ആശുപത്രികളും അടച്ചുപൂട്ടിയിരുന്നു. എന്നാൽ നിലവിൽ സൈബീരിയയിൽ പ്ലേഗ് വ്യാപനത്തിന് സാധ്യതയില്ലെന്ന് റഷ്യ ലോകാരോഗ്യ സംഘടനയെ അറിയിച്ചു.

ലാബ് ടെക്നീഷ്യന്റെ മരണത്തിന് പിന്നാലെ വീണ്ടും പ്ലേഗ് മരണം റിപ്പോർട്ട് ചെയ്തെന്ന തരത്തിൽ പ്രചരിക്കുന്ന വാർത്തകൾ വ്യാജമാണെന്നും റഷ്യൻ അധികൃതർ വ്യക്തമാക്കി. അംഗീകൃത ആരോഗ്യ സംവിധാനങ്ങളിൽ നിന്നുള്ള വിവരങ്ങൾ മാത്രമേ വിശ്വസിക്കാവൂ എന്നും വ്യാജവാർത്തകൾ പ്രചരിപ്പിക്കരുതെന്നും അധികൃതർ മുന്നറിയിപ്പ് നൽകി.

ഷെലെഖോവിലെ ആന്റി-പ്ലേഗ് റിസർച്ച് ഇൻസ്റ്റിറ്റ്യൂട്ടിലെ 28കാരിയായ ലാബ് ടെക്നീഷ്യൻ ഡാരിയ ഷിപിലോവയാണ് മരിച്ചത്. ഇവരുമായി സമ്പർക്കത്തിലുണ്ടായിരുന്ന ആർക്കും പ്ലേഗ് സ്ഥിരീകരിച്ചിട്ടില്ല. ക്വാറന്റീനിലാക്കിയവരിൽ 90 ശതമാനത്തിലേറെ പേരെയും പരിശോധനകൾക്ക് ശേഷം വിട്ടയച്ചതായും സംശയിക്കുന്ന രോഗകാരികളെ കണ്ടെത്താനായില്ലെന്നും ആരോഗ്യവകുപ്പ് അറിയിച്ചു.

അതേസമയം, റഷ്യയിലെ രോഗബാധ സംബന്ധിച്ച് പൊതുജനങ്ങൾക്കുള്ള അപകടസാധ്യത തുടക്കത്തിൽ കുറവാണെന്നാണ് ലോകാരോഗ്യ സംഘടനയുടെ വിലയിരുത്തൽ. എന്നാൽ റഷ്യൻ അധികൃതരിൽ നിന്ന് ലഭിക്കുന്ന വിവരങ്ങൾ പരിമിതമായതിനാൽ സമഗ്രമായ അപകടസാധ്യതാ വിലയിരുത്തൽ നടത്താൻ കഴിയുന്നില്ലെന്നും ലോകാരോഗ്യ സംഘടന വ്യക്തമാക്കി.

എന്താണ് പ്ലേഗ്?

യെർസീനിയ പെസ്റ്റിസ് എന്ന ബാക്ടീരിയ മൂലമുണ്ടാകുന്ന സാംക്രമിക രോഗമാണ് പ്ലേഗ്. സാധാരണയായി ചെറിയ സസ്തനികളിലും അവയിലെ ചെള്ളുകളിലുമാണ് ബാക്ടീരിയ കാണപ്പെടുന്നത്. രോഗബാധിതമായ ചെള്ളിന്റെ കടിയിലൂടെയും രോഗാണുക്കൾ അടങ്ങിയ ശരീരദ്രവങ്ങളുമായോ മലിനമായ വസ്തുക്കളുമായോ ഉള്ള സമ്പർക്കത്തിലൂടെയും മനുഷ്യരിലേക്ക് രോഗം പകരാം. ശ്വാസകോശ പ്ലേഗ് ബാധിച്ചവരുടെ ശ്വാസകോശ കണികകളിലൂടെയും രോഗം പകരാൻ സാധ്യതയുണ്ട്.

ബ്യൂബോണിക്, ന്യൂമോണിക്, സെപ്റ്റിസെമിക് എന്നിങ്ങനെ മൂന്ന് പ്രധാന വിഭാഗങ്ങളാണ് പ്ലേഗിനുള്ളത്. ഇതിൽ ഏറ്റവും സാധാരണമായത് ബ്യൂബോണിക് പ്ലേഗാണ്. രോഗബാധിതമായ ചെള്ളിന്റെ കടിയിലൂടെയാണ് സാധാരണയായി ഇത് പകരുന്നത്. മനുഷ്യരിൽ നിന്ന് മനുഷ്യരിലേക്ക് ബ്യൂബോണിക് പ്ലേഗ് പകരുന്നത് അപൂർവമാണ്. എന്നാൽ രോഗം ശ്വാസകോശത്തിലേക്ക് പടർന്ന് ന്യൂമോണിക് പ്ലേഗായോ രക്തത്തിലേക്ക് പടർന്ന് സെപ്റ്റിസെമിക് പ്ലേഗായോ മാറാം.

ന്യൂമോണിക് പ്ലേഗ്

പ്ലേഗിന്റെ ഏറ്റവും ഗുരുതരമായ രൂപമാണ് ന്യൂമോണിക് പ്ലേഗ്. രോഗബാധയ്ക്ക് പിന്നാലെ 24 മണിക്കൂറിനുള്ളിൽ തന്നെ ലക്ഷണങ്ങൾ പ്രകടമാകാം. രോഗബാധിതനായ ഒരാളിൽ നിന്ന് മറ്റൊരാളിലേക്ക് ശ്വാസകോശ കണികകളിലൂടെ എളുപ്പത്തിൽ പകരുന്നതിനാൽ വലിയതോതിലുള്ള രോഗവ്യാപനത്തിന് കാരണമാകാനും സാധ്യതയുണ്ട്. ചികിത്സ വൈകിയാൽ മരണസാധ്യത വളരെ കൂടുതലാണ്.

രക്തത്തിൽ പ്ലേഗ് ബാക്ടീരിയ അതിവേഗം പെരുകുമ്പോഴാണ് സെപ്റ്റിസെമിക് പ്ലേഗ് ഉണ്ടാകുന്നത്. അവയവങ്ങളുടെ പ്രവർത്തനം നിലയ്ക്കുക, ടിഷ്യൂകൾ നശിക്കുക, ശ്വാസതടസ്സം, ചർമത്തിന് അടിയിൽ രക്തസ്രാവം തുടങ്ങിയ ഗുരുതരമായ സങ്കീർണതകൾക്ക് ഇത് കാരണമാകാം.

പ്രധാന ലക്ഷണങ്ങൾ

പെട്ടെന്നുള്ള പനി, വിറയൽ, തലവേദന, ശരീരവേദന, ബലഹീനത, ഛർദ്ദി, ഓക്കാനം എന്നിവയാണ് ബ്യൂബോണിക് പ്ലേഗിന്റെ സാധാരണ ലക്ഷണങ്ങൾ. ന്യൂമോണിക് പ്ലേഗിൽ ശ്വാസതടസ്സം, രക്തം കലർന്ന കഫത്തോടെയുള്ള ചുമ തുടങ്ങിയ ഗുരുതരമായ ശ്വാസകോശ ലക്ഷണങ്ങളാണ് പ്രധാനമായും കാണപ്പെടുന്നത്.

ചർമത്തിന് അടിയിൽ രക്തസ്രാവം, ചർമത്തിന് നീലനിറം, കൈകാലുകളിലെ ടിഷ്യൂകൾ നശിക്കുക, ഒന്നിലധികം അവയവങ്ങളുടെ പ്രവർത്തനം നിലയ്ക്കുക, കടുത്ത ശ്വാസതടസ്സം എന്നിവ സെപ്റ്റിസെമിക് പ്ലേഗിന്റെ ലക്ഷണങ്ങളാണ്.

ചികിത്സയും പ്രതിരോധവും

പ്ലേഗിന് ആന്റിബയോട്ടിക്കുകളും ആവശ്യമായ സഹായചികിത്സയും നൽകുന്നു. പ്രത്യേകിച്ച് ന്യൂമോണിക് പ്ലേഗിൽ രോഗനിർണയവും ചികിത്സയും വൈകുന്നത് മരണസാധ്യത ഉയർത്തും.

രോഗവ്യാപനം തടയുന്നതിനായി രോഗബാധയുടെ ഉറവിടം കണ്ടെത്തുക, രോഗികളെ ഐസൊലേഷനിൽ പ്രവേശിപ്പിക്കുക, സമ്പർക്കത്തിലായവരെ ക്വാറന്റീനിലാക്കുക, ആരോഗ്യപ്രവർത്തകർക്ക് വ്യക്തിഗത സുരക്ഷാ ഉപകരണങ്ങൾ നൽകുക, സാമ്പിളുകൾ സുരക്ഷിതമായി ശേഖരിച്ച് പരിശോധിക്കുക, അണുനശീകരണം നടത്തുക എന്നിവ പ്രധാന പ്രതിരോധ നടപടികളാണ്.

പതിനാലാം നൂറ്റാണ്ടിൽ ‘കറുത്ത മരണം’ എന്നറിയപ്പെട്ട മഹാമാരിയിലൂടെ ലോകത്ത് കോടിക്കണക്കിന് ആളുകളുടെ മരണത്തിന് കാരണമായ രോഗമാണ് പ്ലേഗ്. എന്നാൽ നിലവിൽ ഫലപ്രദമായ ആന്റിബയോട്ടിക് ചികിത്സ ലഭ്യമായതിനാൽ നേരത്തെ കണ്ടെത്തി ചികിത്സ നൽകിയാൽ രോഗം ഭേദമാക്കാൻ കഴിയും.