കൊച്ചി: വയലിനിസ്റ്റ് ബാലഭാസ്കറിന്റെ അപകടമരണവുമായി ബന്ധപ്പെട്ട സിബിഐ തുടരന്വേഷണത്തിൽ ഗുരുതര വീഴ്ചയുണ്ടായെന്ന് കേരള ഹൈക്കോടതി. കേസ് ലാഘവത്തോടെ കൈകാര്യം ചെയ്ത സിബിഐ അന്വേഷണസംഘത്തെ രൂക്ഷമായി വിമർശിച്ച കോടതി, രണ്ടാമതും തുടരന്വേഷണം വേണ്ടെന്ന വിചാരണക്കോടതി ഉത്തരവ് റദ്ദാക്കി. കുറഞ്ഞത് അഡീഷണൽ എസ്.പി റാങ്കിലുള്ള പുതിയ ഉദ്യോഗസ്ഥനെ അന്വേഷണത്തിനായി രണ്ടാഴ്ചയ്ക്കകം നിയമിക്കണമെന്നാണ് കോടതി നിർദ്ദേശിച്ചത്. ബാലഭാസ്കറിന്റെ മാതാപിതാക്കൾ നൽകിയ ഹർജിയിലാണ് ഹൈക്കോടതിയുടെ ഈ നിർണായക ഉത്തരവ്.
ഹൈക്കോടതി മുൻപ് ചൂണ്ടിക്കാട്ടിയ 20-ഓളം സംശയാസ്പദമായ സാഹചര്യങ്ങൾ അന്വേഷിക്കുന്നതിൽ സിബിഐ പരാജയപ്പെട്ടതായി കോടതി നിരീക്ഷിച്ചു. കേസിന്റെ പ്രാധാന്യം കണക്കിലെടുക്കാതെ താഴ്ന്ന റാങ്കിലുള്ള ഉദ്യോഗസ്ഥനെയാണ് അന്വേഷണത്തിന് ചുമതലപ്പെടുത്തിയത്. ഇതിനുപുറമേ, സംശയനിഴലിലുള്ള സാക്ഷികളുടെ മൊഴികൾ അതുപോലെ വിശ്വസിക്കുകയും ബ്രെയിൻ മാപ്പിങ്, നുണപരിശോധന തുടങ്ങിയ നിർണായകമായ ശാസ്ത്രീയ പരിശോധനകൾ നടത്താതിരിക്കുകയും ചെയ്തത് അന്വേഷണത്തിന്റെ വിശ്വാസ്യതയെ ബാധിച്ചുവെന്നും കോടതി കുറ്റപ്പെടുത്തി.
2018 സെപ്റ്റംബർ 25-ന് തൃശൂരിൽ നിന്ന് തിരുവനന്തപുരത്തേക്കുള്ള യാത്രയ്ക്കിടെ തിരുവനന്തപുരം പള്ളിപ്പുറത്തുണ്ടായ വാഹനാപകടത്തിലാണ് ബാലഭാസ്കറും മകളും മരണപ്പെടുന്നത്. ഡ്രൈവർ അർജുന്റെ അമിതവേഗതയും അശ്രദ്ധയും മൂലമുണ്ടായ സ്വാഭാവിക അപകടമാണിതെന്നായിരുന്നു സിബിഐ റിപ്പോർട്ട്. എന്നാൽ, സ്വർണക്കടത്ത് കേസിൽ ഉൾപ്പെട്ട പ്രകാശ് തമ്പി, വിഷ്ണു സോമസുന്ദരം എന്നിവരുൾപ്പെടെയുള്ളവരുടെ പങ്കാളിത്തം ചൂണ്ടിക്കാട്ടി, ഇതൊരു ആസൂത്രിത കൊലപാതകമാണെന്ന് ബാലഭാസ്കറിന്റെ മാതാപിതാക്കൾ ആരോപിച്ചിരുന്നു. ഉന്നത ഉദ്യോഗസ്ഥന്റെ നേതൃത്വത്തിൽ നടക്കുന്ന പുതിയ അന്വേഷണത്തിലൂടെ സംഭവത്തിലെ സത്യാവസ്ഥ പുറത്തുവരുമെന്ന പ്രതീക്ഷയിലാണ് കുടുംബം.
