ബെംഗളൂരു: ഇന്ത്യൻ ക്രിക്കറ്റ് ടീം പങ്കെടുക്കുന്ന പരമ്പരകൾ കോടികളുടെ വരുമാനം നേടുമ്പോഴും അതിന്റെ സാമ്പത്തിക നേട്ടം വെസ്റ്റ് ഇൻഡീസിന് ലഭിക്കുന്നില്ലെന്ന് ക്രിക്കറ്റ് വെസ്റ്റ് ഇൻഡീസ് സിഇഒ ക്രിസ് ഡെഹ്‌റിംഗ്. നിലവിൽ ഇന്ത്യയിൽ നടക്കുന്ന പരമ്പരയിലൂടെ 20 മുതൽ 30 ദശലക്ഷം ഡോളർ വരെ (ഏകദേശം 193 മുതൽ 285 കോടി രൂപ വരെ) വരുമാനം പ്രതീക്ഷിക്കുന്നുണ്ടെങ്കിലും വെസ്റ്റ് ഇൻഡീസ് ക്രിക്കറ്റിന് ഇതിൽനിന്ന് ഒന്നും ലഭിക്കില്ലെന്നാണ് അദ്ദേഹത്തിന്റെ വിമർശനം. ദ്വിരാഷ്ട്ര പരമ്പരകളിൽനിന്നുള്ള വരുമാനം ആതിഥേയ രാജ്യത്തിന് മാത്രം ലഭിക്കുന്ന രാജ്യാന്തര ക്രിക്കറ്റ് കൗൺസിലിന്റെ വരുമാന പങ്കിടൽ രീതിയെയാണ് ഡെഹ്‌റിംഗ് രൂക്ഷമായി വിമർശിച്ചത്.
വിസ്ഡന്റെ ‘ദി സ്കൂപ്പ്’ എന്ന പരിപാടിക്ക് നൽകിയ അഭിമുഖത്തിലാണ് വെസ്റ്റ് ഇൻഡീസ് ക്രിക്കറ്റിന്റെ സാമ്പത്തിക പ്രതിസന്ധിയെക്കുറിച്ച് അദ്ദേഹം വിശദീകരിച്ചത്. 1997-ൽ ഐസിസി അംഗരാജ്യങ്ങൾ വോട്ടെടുപ്പിലൂടെ നടപ്പാക്കിയ സാമ്പത്തിക നയമാണ് വെസ്റ്റ് ഇൻഡീസ് ക്രിക്കറ്റിന്റെ തകർച്ചയ്ക്ക് വഴിയൊരുക്കിയതെന്ന് ഡെഹ്‌റിംഗ് പറഞ്ഞു. അതിനുമുമ്പ് വിദേശ പര്യടനങ്ങളിൽ പങ്കെടുക്കുന്ന ടീമുകൾക്ക് വലിയ തുക പര്യടന പ്രതിഫലമായി ലഭിച്ചിരുന്നു. സ്വന്തം നാട്ടിൽ പരമ്പരകൾ സംഘടിപ്പിക്കുമ്പോൾ ലഭിക്കുന്നതിനേക്കാൾ ഉയർന്ന തുകയാണ് പലപ്പോഴും ഇതിലൂടെ ലഭിച്ചിരുന്നത്. എന്നാൽ, 1997-ൽ ഈ നിർദേശം ഒമ്പതിനെതിരെ ഒരു വോട്ടിന് പരാജയപ്പെട്ടതോടെ ദ്വിരാഷ്ട്ര പരമ്പരകളിലെ വരുമാനം ആതിഥേയ രാജ്യത്തിന് മാത്രം ലഭിക്കുന്ന രീതി നിലവിൽ വന്നുവെന്നാണ് അദ്ദേഹത്തിന്റെ വിശദീകരണം.
ഈ മാറ്റം വെസ്റ്റ് ഇൻഡീസ് ക്രിക്കറ്റിന് വലിയ തിരിച്ചടിയായെന്നും ഡെഹ്‌റിംഗ് ചൂണ്ടിക്കാട്ടി. ഏകദേശം 150 കോടി ജനങ്ങളുള്ള ഇന്ത്യയുടെ വലിയ ക്രിക്കറ്റ് വിപണിയിൽനിന്നുള്ള വരുമാനം ബിസിസിഐക്ക് ലഭിക്കുമ്പോൾ, ആന്റിഗ്വ, സെന്റ് കിറ്റ്സ് തുടങ്ങിയ ജനസംഖ്യ കുറഞ്ഞ കരീബിയൻ ദ്വീപുകളിൽനിന്നുള്ള പരിമിതമായ വരുമാനത്തെ ആശ്രയിച്ചാണ് വെസ്റ്റ് ഇൻഡീസ് ക്രിക്കറ്റിന് മുന്നോട്ടുപോകേണ്ടിവരുന്നത്. ഐസിസിയുടെ ആകെ വരുമാനത്തിൽ ഇന്ത്യക്ക് 38 ശതമാനത്തിലധികം വിഹിതം ലഭിക്കുമ്പോൾ വെസ്റ്റ് ഇൻഡീസിന് ലഭിക്കുന്നത് അഞ്ച് ശതമാനം മാത്രമാണെന്നും അദ്ദേഹം വ്യക്തമാക്കി.
മുൻ വെസ്റ്റ് ഇൻഡീസ് ക്രിക്കറ്റ് ബോർഡ് പ്രസിഡന്റ് ഡേവ് കാമറൂണും നിലവിലെ വരുമാന പങ്കിടൽ രീതിക്കെതിരെ നേരത്തേ രംഗത്തെത്തിയിരുന്നു. കടുത്ത സാമ്പത്തിക പ്രതിസന്ധിയെ തുടർന്ന് താരങ്ങളുടെ പ്രതിഫലം കുറയ്ക്കാനും കരാർ കാലാവധി ചുരുക്കാനും വെസ്റ്റ് ഇൻഡീസ് ക്രിക്കറ്റ് ബോർഡ് അടുത്തിടെ നിർബന്ധിതമായിരുന്നു. ഇത് താരങ്ങൾക്കിടയിൽ വലിയ പ്രതിഷേധത്തിന് ഇടയാക്കി. ദേശീയ ടീമിനായി കളിക്കുന്നതിനുപകരം ലോകമെമ്പാടുമുള്ള ഫ്രാഞ്ചൈസി ട്വന്റി20 ലീഗുകളിൽ ശ്രദ്ധ കേന്ദ്രീകരിക്കാൻ പല താരങ്ങളും പ്രേരിതരായതായും വിലയിരുത്തപ്പെടുന്നു.
ഒരുകാലത്ത് ലോക ക്രിക്കറ്റിൽ ആധിപത്യം പുലർത്തിയിരുന്ന വെസ്റ്റ് ഇൻഡീസ് ടീമിന്റെ ഇന്നത്തെ തകർച്ചയ്ക്ക് പിന്നിൽ അസമത്വം നിറഞ്ഞ സാമ്പത്തിക നയങ്ങളും വരുമാന വിതരണത്തിലെ അപാകതകളും പ്രധാന കാരണങ്ങളാണെന്നാണ് വിലയിരുത്തൽ.
