കൊൽക്കത്ത: കൊൽക്കത്തയിൽ ദുർഗാപൂജ ആഘോഷത്തിനിടെ ഉണ്ടായ തിക്കിലും തിരക്കിലും പെട്ട് 19 പേർ മരിച്ച സംഭവത്തിൽ സംഘാടകരടക്കം ഏഴുപേരെ പൊലീസ് അറസ്റ്റ് ചെയ്തു. ദുർഗാപൂജ കമ്മിറ്റി സെക്രട്ടറി രാജ് കുമാർ സേവ്ദ, വൈസ് പ്രസിഡന്റ് ശാന്തനു ദുബെ, പന്തൽ നിർമിച്ച ബിപ്ലബ് മുഖർജി, തിരക്ക് നിയന്ത്രിക്കാനുള്ള ചുമതലയുണ്ടായിരുന്ന കൗശിക് സാഹ, പിന്റു ഡേ, സ്വകാര്യ സുരക്ഷാ വിഭാഗത്തിന്റെ ചുമതലയുള്ള സുമൻ ചക്രബർത്തി, രാജേഷ് പാൽ എന്നിവരാണ് അറസ്റ്റിലായത്. സംഭവത്തിൽ കുറ്റകരമായ നരഹത്യാ വകുപ്പ് ചുമത്തി കൊൽക്കത്ത പൊലീസ് സ്വമേധയാ കേസെടുത്തു. ദുരന്തത്തിന്റെ പശ്ചാത്തലത്തിൽ ക്രമസമാധാന നില ഉറപ്പാക്കുന്നതിനായി നഗരത്തിന്റെ വിവിധ ഭാഗങ്ങളിൽ ഒക്ടോബർ 20 വരെ നിരോധനാജ്ഞ പ്രഖ്യാപിച്ചു.
വടക്കൻ കൊൽക്കത്തയിലെ ചോർബാഗനിൽ ശനിയാഴ്ച വൈകിട്ട് 7.40ഓടെയായിരുന്നു ദുരന്തം. നവരാത്രിയുടെ ഏഴാം ദിവസമായ ശനിയാഴ്ച ചോർബാഗനിലെ സർവജനീൻ ദുർഗാപൂജ പന്തലിൽ ആഘോഷപരിപാടികൾ നടക്കുന്നതിനിടെ കനത്ത മഴ പെയ്തതാണ് തിക്കിനും തിരക്കിനും കാരണമായതെന്നാണ് പ്രാഥമിക വിവരം. സംഭവത്തിൽ മരിച്ചവരെ തിരിച്ചറിയാനുള്ള നടപടികൾ പൊലീസ് തുടരുകയാണ്. 25 പേർക്ക് പരിക്കേറ്റിട്ടുണ്ട്.
സംഭവസ്ഥലത്ത് ഫൊറൻസിക് വിഭാഗം, പ്രത്യേക ദൗത്യസേന, അഗ്നിരക്ഷാസേന എന്നിവരുടെ നേതൃത്വത്തിൽ പരിശോധന ആരംഭിച്ചു. കൊൽക്കത്ത മെഡിക്കൽ കോളജ് ആശുപത്രിയിലെത്തി കേന്ദ്ര ആഭ്യന്തരമന്ത്രി അമിത് ഷാ പരിക്കേറ്റവരെ സന്ദർശിച്ചു. ദുർഗാപൂജ പരിപാടികളിൽ പങ്കെടുക്കുന്നതിനായി ശനിയാഴ്ച വൈകിട്ടാണ് അമിത് ഷാ സംസ്ഥാനത്തെത്തിയത്.
സംഘാടകർ മൈക്കിലൂടെ നടത്തിയ അറിയിപ്പാണ് തിക്കിനും തിരക്കിനും കാരണമായതെന്ന് മുഖ്യമന്ത്രി സുവേന്ദു അധികാരി പറഞ്ഞു. കൊൽക്കത്ത മെഡിക്കൽ കോളജ് ആശുപത്രിയിൽ ചികിത്സയിലുള്ളവരെ സന്ദർശിച്ചശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. സ്വകാര്യ സുരക്ഷാ ജീവനക്കാർ വിസിൽ മുഴക്കിയതാണ് ആളുകൾ പരിഭ്രാന്തരായി തിരക്കുകൂട്ടാൻ കാരണമായതെന്ന് മരിച്ചവരുടെ കുടുംബാംഗങ്ങൾ പറഞ്ഞതായും മുഖ്യമന്ത്രി വ്യക്തമാക്കി. എന്നാൽ, സംഘാടകർ നടത്തിയ അറിയിപ്പിന്റെ ഉള്ളടക്കം എന്തായിരുന്നുവെന്ന് വ്യക്തമായിട്ടില്ല.
ദുരന്തത്തിന്റെ പശ്ചാത്തലത്തിൽ സംസ്ഥാനത്തെ ദുർഗാപൂജാ പരിപാടികളുടെ സംഘാടകർ മതിയായ വെളിച്ചവും പ്രവേശനത്തിനും പുറത്തുകടക്കുന്നതിനുമുള്ള പ്രത്യേക കവാടങ്ങളും ഉറപ്പാക്കണമെന്ന് നിർദേശം നൽകിയിട്ടുണ്ട്. സംഭവത്തെ തുടർന്ന് കേന്ദ്രമന്ത്രി അമിത് ഷാ പങ്കെടുക്കാനിരുന്ന പരിപാടി ഉൾപ്പെടെ എല്ലാ ഔദ്യോഗിക പരിപാടികളും മാറ്റിവെച്ചതായും മുഖ്യമന്ത്രി അറിയിച്ചു.
