കൊച്ചി: നിതീഷ് തിവാരി സംവിധാനം ചെയ്യുന്ന ബ്രഹ്മാണ്ഡ ചിത്രം ‘രാമായണ’യുടെ ആദ്യ ഭാഗത്തിന് സെൻസർ ബോർഡിന്റെ യു സർട്ടിഫിക്കറ്റ് ലഭിച്ചു. 2026 നവംബർ 5ന് തിയേറ്ററുകളിലെത്തുന്ന ചിത്രത്തിന് മൂന്ന് മണിക്കൂറും 15 മിനിറ്റുമാണ് ദൈർഘ്യം. ചിത്രത്തിലെ ‘രാവണതാണ്ഡവം’ എന്ന ഗാനവും കഴിഞ്ഞ ദിവസം പുറത്തിറങ്ങിയിരുന്നു. എ.ആർ. റഹ്മാനാണ് ഗാനത്തിന് സംഗീതം നൽകിയിരിക്കുന്നത്.
രൺബീർ കപൂർ ശ്രീരാമനായും യഷ് രാവണനായും എത്തുന്ന ചിത്രത്തിൽ സായ് പല്ലവിയാണ് സീതയെ അവതരിപ്പിക്കുന്നത്. മലയാളികളുടെ പ്രിയതാരം ശോഭന കൈകേയിയായും അരുൺ ഗോവിൽ ദശരഥ മഹാരാജാവായും വേഷമിടുന്നു. ലക്ഷ്മണനായി രവി ദുബെയും വിശ്വാമിത്ര മഹർഷിയായി അജിങ്ക്യ ദേവും ഇന്ദ്രദേവനായി കുനാൽ കപൂറും ശൂർപ്പണഖയായി രാകുൽ പ്രീത് സിംഗും എത്തുന്നു.
നമിത് മൽഹോത്രയുടെ പ്രൈം ഫോക്കസ് സ്റ്റുഡിയോസ്, യഷിന്റെ മോൺസ്റ്റർ മൈൻഡ് ക്രിയേഷൻസ്, പ്രമുഖ വിഷ്വൽ ഇഫക്റ്റ്സ് കമ്പനിയായ ഡിഎൻഇജി എന്നിവർ ചേർന്നാണ് ചിത്രം നിർമിക്കുന്നത്. മലയാളം, ഹിന്ദി, തമിഴ്, തെലുങ്ക്, കന്നഡ എന്നീ അഞ്ച് ഭാഷകളിൽ ചിത്രം റിലീസ് ചെയ്യും. സോണി പിക്ചേഴ്സാണ് ചിത്രത്തിന്റെ അന്താരാഷ്ട്ര വിതരണച്ചുമതല ഏറ്റെടുത്തിരിക്കുന്നത്.
ഓസ്കർ ജേതാക്കളായ ഹാൻസ് സിമ്മറും എ.ആർ. റഹ്മാനും ആദ്യമായി ഒന്നിക്കുന്നു എന്നതും ചിത്രത്തിന്റെ പ്രത്യേകതയാണ്. ഓസ്കർ ജേതാവായ ശ്രീധർ രാഘവനാണ് തിരക്കഥ ഒരുക്കിയിരിക്കുന്നത്. ചിത്രത്തിലെ ദൃശ്യവിസ്മയങ്ങൾ ഒരുക്കുന്നത് എട്ട് തവണ അക്കാദമി അവാർഡ് നേടിയ ഡിഎൻഇജിയാണ്.
രണ്ട് ഭാഗങ്ങളായി ഒരുങ്ങുന്ന ‘രാമായണം’ ഇന്ത്യൻ സിനിമയിലെ ഏറ്റവും വലിയ ബജറ്റിലുള്ള ചിത്രങ്ങളിൽ ഒന്നായാണ് അവതരിപ്പിക്കപ്പെടുന്നത്. ചിത്രത്തിന്റെ റിലീസ് തീയതി പ്രഖ്യാപിച്ച പോസ്റ്ററും ട്രെയിലറും ഇതിനോടകം സിനിമാപ്രേമികളുടെ ശ്രദ്ധ നേടിയിട്ടുണ്ട്.
