തിരുവനന്തപുരം: ജനകീയ ആരോഗ്യ മേഖലയെ തകർക്കുന്ന നയങ്ങളാണ് യുഡിഎഫ് സർക്കാർ നടപ്പാക്കുന്നതെന്ന് സിപിഎം സംസ്ഥാന സെക്രട്ടറി എംവി ഗോവിന്ദൻ ആരോപിച്ചു. ആരോഗ്യ മേഖലയിലെ ഡോക്ടർമാരെ വ്യാപകമായി സ്ഥലം മാറ്റുകയാണെന്നും എല്ലാം സ്വകാര്യവൽക്കരിക്കാനാണ് സർക്കാരിന്റെ ശ്രമമെന്നും അദ്ദേഹം പറഞ്ഞു.

എസ്എംഎ മരുന്ന് വിവാദത്തിൽ രക്ഷിതാക്കളുടെ ആശങ്കകൾ പരിഹരിക്കാൻ ആരോഗ്യ മന്ത്രി തയ്യാറാകണമെന്ന് എംവി ഗോവിന്ദൻ ആവശ്യപ്പെട്ടു. വിഷയത്തിൽ മന്ത്രി കൃത്യമായ മറുപടി നൽകുന്നില്ലെന്നും മറുപടി പറയേണ്ട സമയത്ത് പരിഹാസപരമായ നിലപാടാണ് സ്വീകരിക്കുന്നതെന്നും അദ്ദേഹം വിമർശിച്ചു. ആരോഗ്യ മന്ത്രിയുടെ നിലപാട് ശരിയായ രീതിയിലുള്ളതല്ലെന്നും അദ്ദേഹം കൂട്ടിച്ചേർത്തു.

ആരോഗ്യ മേഖലയിലെ ടാസ്‌ക് ഫോഴ്‌സ് അംഗങ്ങളുടെ യോഗ്യതയെയും എംവി ഗോവിന്ദൻ ചോദ്യം ചെയ്തു. അഴിമതി ആരോപണങ്ങൾ നേരിടുന്നവരെ വിദഗ്ധരായി ഉൾപ്പെടുത്തിയത് എന്തിനാണെന്ന് അദ്ദേഹം ചോദിച്ചു. മുൻ ആരോഗ്യ മന്ത്രിമാരെ കെ. മുരളീധരൻ വ്യക്തിപരമായി അധിക്ഷേപിക്കുകയാണെന്നും ആരോപിച്ചു.

യുഡിഎഫ് സർക്കാരിന്റെ സാമ്പത്തിക നയങ്ങൾ കേന്ദ്ര സർക്കാരിന്റേതിന് സമാനമാണെന്നും അദ്ദേഹം പറഞ്ഞു. കിഫ്ബിയെ തകർത്ത് കേരളത്തിന്റെ വികസന പ്രവർത്തനങ്ങളെ ദുർബലപ്പെടുത്താനാണ് ശ്രമം നടക്കുന്നത്. കിഫ്ബിക്കെതിരെ കേന്ദ്ര ഏജൻസികൾ നീക്കം നടത്തിയെങ്കിലും അതിനെ അതിജീവിച്ചാണ് സർക്കാർ മുന്നോട്ടുപോയതെന്നും അദ്ദേഹം അവകാശപ്പെട്ടു.

ഭൂമി ഏറ്റെടുക്കുന്നത് കിഫ്ബി നേരിട്ടല്ലെന്നും 2013-ലെ ഭൂമി ഏറ്റെടുക്കൽ നിയമപ്രകാരമാണ് നടപടികൾ സ്വീകരിച്ചതെന്നും എംവി ഗോവിന്ദൻ വ്യക്തമാക്കി. കണ്ണൂരിലെ ഭൂമി ഏറ്റെടുക്കലുമായി ബന്ധപ്പെട്ട് മുഖ്യമന്ത്രിയടക്കമുള്ളവർ ദുരുദ്ദേശപരമായ പരാമർശങ്ങൾ നടത്തിയെന്നും അദ്ദേഹം ആരോപിച്ചു.

കേരളത്തിന്റെ വിഭവശേഷിയുമായി ബന്ധപ്പെട്ട വിവരങ്ങൾ വിദേശ ഏജൻസികൾക്ക് ലഭിക്കാനിടയുള്ള രീതിയിൽ ആസൂത്രണ പ്രവർത്തനങ്ങൾ സ്വകാര്യ ഏജൻസികൾക്ക് കൈമാറാനുള്ള നീക്കം നടക്കുന്നുണ്ടെന്നും അദ്ദേഹം പറഞ്ഞു. കേന്ദ്ര സർക്കാർ അമിതാധികാര പ്രവണത കാണിക്കുകയാണെന്നും കോൺഗ്രസും ബിജെപിയും തമ്മിൽ രഹസ്യ ധാരണയുണ്ടെന്നും എംവി ഗോവിന്ദൻ ആരോപിച്ചു. സിപിഎമ്മിന്റെ വിപുലീകൃത സംസ്ഥാന, ജില്ലാ കമ്മിറ്റി യോഗങ്ങളിൽ ഭാവി പ്രവർത്തനങ്ങൾ ചർച്ച ചെയ്തതായും അദ്ദേഹം അറിയിച്ചു.