തിരുവനന്തപുരം: ഭാഷാടിസ്ഥാനത്തിൽ ഐക്യകേരളം രൂപം കൊണ്ടിട്ട് ഇന്ന് ഏഴ് പതിറ്റാണ്ട്. കേരളപ്പിറവിയുടെ 70-ാം വാർഷികം സംസ്ഥാനത്തുടനീളം വിപുലമായ പരിപാടികളോടെ ആഘോഷിക്കുന്നു. സംസ്ഥാനത്തിന്റെ പേര് ഔദ്യോഗികമായി കേരളം എന്നാക്കിയ ശേഷമുള്ള ആദ്യ കേരളപ്പിറവി ദിനം എന്ന പ്രത്യേകതയും ഇത്തവണയുണ്ട്.
സർക്കാരിന്റെയും വിവിധ സംഘടനകളുടെയും നേതൃത്വത്തിൽ വിവിധയിടങ്ങളിൽ ആഘോഷ പരിപാടികൾ സംഘടിപ്പിച്ചിട്ടുണ്ട്. മാതൃഭാഷയുടെ പ്രാധാന്യവും കേരളത്തിന്റെ ചരിത്രവും സംസ്കാരവും ഓർമിപ്പിക്കുന്ന പരിപാടികളാണ് പ്രധാനമായും നടക്കുന്നത്.
തലസ്ഥാനത്ത് വിപുലമായ ആഘോഷങ്ങൾ
കേരളപ്പിറവിയുടെ എഴുപതാം വാർഷികത്തോടനുബന്ധിച്ച് തിരുവനന്തപുരത്ത് പ്രത്യേക പരിപാടികൾ ഒരുക്കിയിട്ടുണ്ട്. രാവിലെ 10 മണിക്ക് നിയമസഭാ സമുച്ചയത്തിൽ നടക്കുന്ന ചടങ്ങിൽ സ്പീക്കർ തിരുവഞ്ചൂർ രാധാകൃഷ്ണൻ അധ്യക്ഷത വഹിക്കും.
ചടങ്ങിൽ മുൻ സ്പീക്കർമാർ, ഡെപ്യൂട്ടി സ്പീക്കർമാർ, മുൻ നിയമസഭാ സെക്രട്ടറിമാർ, മുതിർന്ന മാധ്യമപ്രവർത്തകർ എന്നിവരെ ആദരിക്കും. അന്താരാഷ്ട്ര കായിക മത്സരങ്ങളിൽ നേട്ടങ്ങൾ കൈവരിച്ച മുൻ നിയമസഭാംഗം എം.ജെ. ജേക്കബിനെയും ചടങ്ങിൽ പ്രത്യേകമായി ആദരിക്കും.
ഇതിന്റെ ഭാഗമായി നിയമസഭാ ലൈബ്രറി റഫറൻസ് ഹാളിൽ എട്ടുദിവസം നീണ്ടുനിൽക്കുന്ന പുസ്തക പ്രദർശനവും സംഘടിപ്പിക്കുന്നുണ്ട്. രാവിലെ 9.15ന് സ്പീക്കർ തിരുവഞ്ചൂർ രാധാകൃഷ്ണൻ പ്രദർശനം ഉദ്ഘാടനം ചെയ്യും.
അതേസമയം, 2026-ലെ മലയാള സാഹിത്യത്തിലെ പരമോന്നത ബഹുമതിയായ എഴുത്തച്ഛൻ പുരസ്കാര പ്രഖ്യാപനവും ഇന്ന് നടക്കും. കേരളത്തിന്റെ എഴുപതാം കേരളപ്പിറവി ആഘോഷങ്ങൾക്ക് ഇതും കൂടുതൽ പ്രാധാന്യം നൽകുന്നു.
