തിരുവനന്തപുരം: കേരളം നേരിടുന്ന ഊർജ പ്രതിസന്ധിയിൽ ഇടപെട്ട് പാർലമെന്റ് പബ്ലിക് അക്കൗണ്ട്സ് കമ്മിറ്റി. വൈദ്യുതി ആവശ്യകത വർധിക്കുന്ന പീക്ക് സീസണുകളിൽ തടസ്സമില്ലാതെ വൈദ്യുതി ലഭ്യമാക്കാൻ കേന്ദ്ര-സംസ്ഥാന സർക്കാരുകൾ സംയുക്തമായി പദ്ധതി തയ്യാറാക്കണമെന്ന് കമ്മിറ്റി നിർദേശിച്ചു. കേന്ദ്ര ഊർജ സെക്രട്ടറി, സംസ്ഥാന ഊർജ സെക്രട്ടറി, എൻടിപിസി ചെയർമാൻ എന്നിവർ സംയുക്തമായി ചർച്ച നടത്തി കേരളത്തിന്റെ ഊർജ പ്രതിസന്ധിക്ക് പരിഹാരം കാണണമെന്നും നിർദേശമുണ്ട്.
പിഎസി ചെയർമാൻ കെ.സി. വേണുഗോപാലാണ് വാർത്താസമ്മേളനത്തിൽ കമ്മിറ്റി തീരുമാനങ്ങൾ വിശദീകരിച്ചത്. കേരളത്തിലെ ഊർജ പ്രതിസന്ധി പരിഹരിക്കുന്നതിനുള്ള കൃത്യമായ പദ്ധതി തയ്യാറാക്കി ഒരു മാസത്തിനകം റിപ്പോർട്ട് സമർപ്പിക്കാനാണ് കമ്മിറ്റി നിർദേശിച്ചിരിക്കുന്നത്.
നിർദേശം നടപ്പാക്കുന്നതിൽ വീഴ്ചയുണ്ടായാൽ കായംകുളം എൻടിപിസിക്ക് നൽകിയ 300 ഏക്കർ ഭൂമി തിരിച്ചെടുക്കണമെന്ന പിഎസിയുടെ തീരുമാനം സർക്കാരിനെ അറിയിക്കുമെന്നും കെ.സി. വേണുഗോപാൽ വ്യക്തമാക്കി.
കായംകുളം എൻടിപിസിയുടെ പ്രവർത്തനവും കമ്മിറ്റി വിശദമായി ചർച്ച ചെയ്തു. കേരളത്തിന്റെ വൈദ്യുതി ആവശ്യങ്ങൾ പരിഹരിക്കുന്നതിൽ എൻടിപിസിയുടെ പങ്കും ലഭ്യമായ സൗകര്യങ്ങളും സംബന്ധിച്ച കാര്യങ്ങളും പരിശോധനയ്ക്ക് വിധേയമാക്കി.
അതേസമയം, രാഷ്ട്രീയ വിഷയങ്ങളിൽ പ്രതികരിക്കാനില്ലെന്ന് കെ.സി. വേണുഗോപാൽ പറഞ്ഞു. പിഎസി കൈക്കൊണ്ട തീരുമാനങ്ങൾ വിശദീകരിക്കാനാണ് വാർത്താസമ്മേളനം വിളിച്ചതെന്നും അദ്ദേഹം കൂട്ടിച്ചേർത്തു.
കേരളത്തിന്റെ വർധിച്ചുവരുന്ന വൈദ്യുതി ആവശ്യകതയും പീക്ക് സമയങ്ങളിലെ പ്രതിസന്ധിയും പരിഹരിക്കുന്നതിന് കേന്ദ്ര-സംസ്ഥാന തലത്തിൽ ഏകോപിതമായ ഇടപെടൽ വേണമെന്ന നിർദേശമാണ് ഇതോടെ പിഎസി മുന്നോട്ടുവച്ചിരിക്കുന്നത്.
