ഇന്ത്യക്കെതിരായ ഏകദിന പരമ്പരയിൽ ന്യൂസിലാൻഡിന് തിരിച്ചടി. പരിശീലനത്തിനിടെയുണ്ടായ കൂട്ടിയിടിയിൽ തലയ്ക്ക് പരിക്കേറ്റ ബാറ്റർ ഡെവൺ കോൺവേ പരമ്പരയിലെ ശേഷിക്കുന്ന മത്സരങ്ങളിൽ നിന്ന് പുറത്തായി. അതേസമയം, പരിക്കിനെത്തുടർന്ന് ആശങ്കയിലായിരുന്ന പേസർ മാറ്റ് ഹെന്റിക്ക് രണ്ടാം ഏകദിനത്തിൽ കളിക്കാൻ മെഡിക്കൽ ക്ലിയറൻസ് ലഭിച്ചു.
ചൊവ്വാഴ്ച ഓക്ക്ലൻഡിലെ ഈഡൻ പാർക്കിൽ നടന്ന പരിശീലനത്തിനിടെയാണ് ക്യാച്ചെടുക്കാനുള്ള ശ്രമത്തിനിടെ കോൺവേയും ഹെന്റിയും കൂട്ടിയിടിച്ചത്. ഇരുവരെയും ഉടൻ വൈദ്യപരിശോധനയ്ക്ക് വിധേയരാക്കി. തുടർന്ന് നടത്തിയ വിശദമായ പരിശോധനയിൽ കോൺവേയ്ക്ക് കൺകഷൻ (തലയ്ക്കേറ്റ ആഘാതത്തെ തുടർന്നുള്ള പരിക്ക്) സ്ഥിരീകരിക്കുകയായിരുന്നു.
ഇതോടെ 35കാരനായ താരത്തിന് പരമ്പരയിലെ ശേഷിക്കുന്ന നാല് മത്സരങ്ങളും നഷ്ടമാകും. ഇന്ത്യക്കെതിരായ വരാനിരിക്കുന്ന രണ്ട് മത്സരങ്ങളടങ്ങിയ ലോക ടെസ്റ്റ് ചാമ്പ്യൻഷിപ്പ് പരമ്പരയ്ക്ക് മുമ്പ് പൂർണ കായികക്ഷമത വീണ്ടെടുക്കുകയാണ് ഇനി ലക്ഷ്യം. കോൺവേയ്ക്ക് പകരക്കാരനായി ഇടംകൈയൻ ബാറ്റർ നിക് കെല്ലിയെ ന്യൂസിലാൻഡ് ടീമിൽ ഉൾപ്പെടുത്തിയിട്ടുണ്ട്.
നേരത്തെ മാർക്ക് ചാപ്മാൻ, രചിൻ രവീന്ദ്ര എന്നിവരും പരിക്കുമൂലം ടീമിൽ നിന്ന് പുറത്തായിരുന്നു. ഇതോടെ ന്യൂസിലാൻഡിന്റെ ബാറ്റിങ് നിര കൂടുതൽ പ്രതിസന്ധിയിലായി.
അതേസമയം, കൂട്ടിയിടിയിൽ പരിക്കേറ്റ പേസർ മാറ്റ് ഹെന്റിക്ക് ഗുരുതരമായ പരിക്കുകളില്ലെന്ന് പരിശോധനയിൽ വ്യക്തമായി. രണ്ടാം ഏകദിനത്തിൽ കളിക്കാൻ താരം സജ്ജനാണെന്ന് മെഡിക്കൽ സംഘം അനുമതി നൽകി. വലതുകാലിലെ പേശികൾക്കേറ്റ പരിക്കിനെത്തുടർന്ന് ഇന്ത്യക്കെതിരായ ടി20 പരമ്പരയിലെ അവസാന മൂന്ന് മത്സരങ്ങൾ ഹെന്റിക്ക് നഷ്ടമായിരുന്നു.
ആദ്യ ഏകദിനത്തിൽ കോൺവേയ്ക്ക് പകരം ഓപ്പണറായി ഇറങ്ങിയ ടിം സീഫെർട്ട് 43 പന്തിൽ 38 റൺസ് നേടിയിരുന്നു. മത്സരത്തിൽ അഞ്ച് വിക്കറ്റിനായിരുന്നു ഇന്ത്യയുടെ വിജയം.
ശനിയാഴ്ച ഹാമിൽട്ടണിലെ സെഡൺ പാർക്കിൽ നടക്കുന്ന രണ്ടാം ഏകദിനത്തിൽ വിജയിച്ച് പരമ്പരയിൽ തിരിച്ചെത്താനാണ് ന്യൂസിലാൻഡിന്റെ ലക്ഷ്യം. ആദ്യ മത്സരം വിജയിച്ച ഇന്ത്യ പരമ്പരയിലെ ലീഡ് ഉയർത്താനായും ഇറങ്ങും.
