കൊച്ചി: പെരിയാർ പുഴയിൽ നിന്ന് അനധികൃതമായി മണൽ വാരിക്കടത്തിയ ആറുപേരെ പൊലീസ് പിടികൂടി. വരാപ്പുഴ പുത്തൻവേലിക്കര പൊലീസ് സ്റ്റേഷൻ പരിധിയിലാണ് സംഭവം. രണ്ട് വഞ്ചികളിലായാണ് പ്രതികൾ മണൽ കടത്തിയിരുന്നത്.
ചെട്ടിക്കാട് സ്വദേശികളായ സന്തോഷ്, ജിമിൽ, ലാലു, കൊടുങ്ങല്ലൂർ മേത്തല സ്വദേശികളായ റഷീദ്, സജീവൻ, അഴീക്കോട് സ്വദേശി അജേഷ് എന്നിവരാണ് പിടിയിലായത്. രണ്ട് കേസുകളിലായാണ് ഇവരെ പൊലീസ് അറസ്റ്റ് ചെയ്തത്.
പൊലീസിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് പ്രതികളെ പിടികൂടിയത്. നേരത്തെയും കൊടുങ്ങല്ലൂർ, വടക്കേക്കര പൊലീസ് സ്റ്റേഷനുകളിൽ രജിസ്റ്റർ ചെയ്ത സമാന കേസുകളിൽ ഇവർ ഉൾപ്പെട്ടിട്ടുണ്ടെന്ന് പൊലീസ് അറിയിച്ചു.
സമീപകാലത്ത് അനധികൃതമായി മണൽ വാരിയിരുന്ന ഏഴ് വള്ളങ്ങളും പുത്തൻവേലിക്കര പൊലീസ് പിടിച്ചെടുത്തിരുന്നു. എസ്ഐ എൻ.ജി. അനീഷ് കുമാറിന്റെ നേതൃത്വത്തിലുള്ള പൊലീസ് സംഘമാണ് നടപടി സ്വീകരിച്ചത്. അനധികൃത മണൽ വാരലിനെതിരെ കർശന നടപടി തുടരുമെന്ന് പൊലീസ് അറിയിച്ചു.
