ന്യൂഡൽഹി: 2023-ൽ പാർലമെന്റിൽ സുരക്ഷാ ലംഘനം നടത്തിയ കേസിലെ പ്രതികളായ മനോരഞ്ചൻ ഡി., സാഗർ ശർമ എന്നിവരുടെ രണ്ടാമത്തെ ജാമ്യാപേക്ഷയും ഡൽഹി പ്രത്യേക കോടതി തള്ളി. പ്രതികൾക്കെതിരായ യു.എ.പി.എ കുറ്റങ്ങൾ പ്രഥമദൃഷ്ട്യാ നിലനിൽക്കുന്നതാണെന്ന് നിരീക്ഷിച്ചാണ് പ്രത്യേക എൻ.ഐ.എ കോടതി ജഡ്ജി കിരൺ ബൻസാലിന്റെ നടപടി.
2023 ഡിസംബർ 13-നായിരുന്നു പാർലമെന്റിലെ സന്ദർശക ഗാലറിയിൽനിന്ന് ലോക്‌സഭാ ചേംബറിലേക്ക് ചാടിയിറങ്ങി പ്രതികൾ ഷൂസിനുള്ളിൽ ഒളിപ്പിച്ചിരുന്ന നിറമുള്ള പുകക്കുഴലുകൾ തുറന്നുവിട്ടത്. ഇതോടെ പാർലമെന്റിനുള്ളിൽ പരിഭ്രാന്തി പടരുകയായിരുന്നു.
2001-ലെ പാർലമെന്റ് ആക്രമണത്തിന്റെ വാർഷികദിനത്തിൽ പാർലമെന്റ് നടപടികൾ തടസ്സപ്പെടുത്താനും ഭീകരാന്തരീക്ഷം സൃഷ്ടിക്കാനുമാണ് പ്രതികൾ പദ്ധതിയിട്ടിരുന്നതെന്ന് കോടതി നിരീക്ഷിച്ചു. ഇവരുടെ പ്രവൃത്തി പാർലമെന്റിന്റെ പ്രവർത്തനങ്ങളെ തടസ്സപ്പെടുത്തിയെന്നും രാജ്യത്തിന്റെ പരമാധികാരത്തിനും അഖണ്ഡതയ്ക്കും ഭീഷണിയുയർത്തിയെന്നും കോടതി ചൂണ്ടിക്കാട്ടി.
2023 ഡിസംബർ 14 മുതൽ കസ്റ്റഡിയിലുള്ള തങ്ങളുടെ പേരിൽ പ്രധാന കുറ്റപത്രവും നാല് അനുബന്ധ കുറ്റപത്രങ്ങളും സമർപ്പിച്ചതോടെ അന്വേഷണം പൂർത്തിയായെന്ന് പ്രതിഭാഗം വാദിച്ചു. പുകക്കുഴലുകൾ ഉപയോഗിച്ചതിനെ യു.എ.പി.എ പ്രകാരമുള്ള ഭീകരപ്രവർത്തനമായി കണക്കാക്കാനാവില്ലെന്നും വിചാരണ നീണ്ടുപോകാൻ സാധ്യതയുണ്ടെന്നും പ്രതികൾ കോടതിയെ അറിയിച്ചു.
എന്നാൽ, യു.എ.പി.എയിലെ 43ഡി(5) വകുപ്പ് പ്രകാരം പ്രതികൾക്കെതിരായ ആരോപണങ്ങൾ പ്രഥമദൃഷ്ട്യാ ശരിയാണെന്ന് കോടതിക്ക് ബോധ്യപ്പെട്ടിട്ടുണ്ടെന്നും അതിനാൽ ജാമ്യം അനുവദിക്കുന്നതിന് നിയമപരമായ തടസ്സമുണ്ടെന്നും ജഡ്ജി വ്യക്തമാക്കി. വിചാരണ വൈകുന്നു എന്ന കാരണം മാത്രം ചൂണ്ടിക്കാട്ടി നിയമത്തിലെ ഈ നിയന്ത്രണം മറികടന്ന് ജാമ്യം അനുവദിക്കാനാവില്ലെന്നും കോടതി നിരീക്ഷിച്ചു.
