തൃശൂർ: അച്ഛനെയും മകനെയും തട്ടിക്കൊണ്ടുപോയി മർദിച്ച് പണം തട്ടിയെടുത്ത കേസിൽ ആറംഗ സംഘം അറസ്റ്റിൽ. തൃശൂർ വടമയിലാണ് സംഭവം. നെയ്തക്കുടി സ്വദേശി നെല്ലുപറമ്പിൽ വീട്ടിൽ ഫാസിൽ (36), വടമ സ്വദേശി നാലകത്ത് വീട്ടിൽ ആഷിഖ് (36), മേത്തല സ്വദേശി മച്ചമ്പിള്ളി വീട്ടിൽ രാജഗോപാൽ (21), വടമ സ്വദേശി കൊണാട്ടുപറമ്പിൽ വീട്ടിൽ ഉനൈസ് (34), മാളപ്പള്ളിപ്പുറം സ്വദേശി കുറ്റിപ്പുഴക്കാരൻ വീട്ടിൽ നജീബ് (24), മേത്തല സ്വദേശി ഈശ്വരമംഗലത്ത് വീട്ടിൽ സിജീഷ് (39) എന്നിവരാണ് അറസ്റ്റിലായത്.
വടമയിൽ താമസിക്കുന്ന നടുമുറി വീട്ടിൽ ജയറാം (54), മകൻ ഹരികൃഷ്ണൻ (20) എന്നിവരെയാണ് സംഘം തട്ടിക്കൊണ്ടുപോയി ഭീഷണിപ്പെടുത്തുകയും മർദിക്കുകയും ചെയ്തത്. എട്ട് ലക്ഷം രൂപ ആവശ്യപ്പെട്ടായിരുന്നു തട്ടിക്കൊണ്ടുപോകൽ. എന്നാൽ ഇവരുടെ ബാങ്ക് അക്കൗണ്ടിൽനിന്ന് ഒന്നര ലക്ഷം രൂപയും വീട്ടിലുണ്ടായിരുന്ന ലാപ്ടോപ്പ്, ടാബ്, മൊബൈൽ ഫോൺ, ബൈക്ക് എന്നിവയും സംഘം തട്ടിയെടുത്തു.
മാള ഇൻസ്പെക്ടർ എ.എൻ. ഷാജു, എസ്.ഐ. പി.പി. ബാബു എന്നിവരുടെ നേതൃത്വത്തിലുള്ള പൊലീസ് സംഘമാണ് പ്രതികളെ അറസ്റ്റ് ചെയ്തത്.


