മലപ്പുറം: ഓടിക്കൊണ്ടിരുന്ന ട്രെയിനിന് മുകളിലേക്ക് സംരക്ഷണഭിത്തി ഇടിഞ്ഞുവീണ സംഭവം തുവ്വൂർ കമാനം മേൽപ്പാലത്തിൽ. നിലമ്പൂർ–ഷൊർണ്ണൂർ മെമു ട്രെയിനിനാണ് അപകടം ഉണ്ടായത്. ചൊവ്വാഴ്ച പുലർച്ചെ 3.30ഓടെയായിരുന്നു സംഭവം. തുടർന്ന് ഏകദേശം 7.45ഓടെയാണ് ട്രെയിൻ ഗതാഗതം പുനഃസ്ഥാപിച്ചത്. സംഭവത്തെ തുടർന്ന് മറ്റു ട്രെയിനുകളുടെ സമയക്രമവും ബാധിക്കപ്പെട്ടു.
കല്ലുകൾ വീണ് ട്രെയിനിന് ചെറിയ കേടുപാടുകൾ സംഭവിച്ചെങ്കിലും വലിയ അപകടം ഒഴിവായി. വേഗത കുറച്ച് ഓടിയിരുന്നതാണ് ദുരന്തം ഒഴിവാക്കാൻ കാരണമായത്. മാസങ്ങൾക്ക് മുൻപാണ് റെയിൽപാത നവീകരണത്തിന്റെ ഭാഗമായി തുവ്വൂർ കമാനം മേൽപ്പാലത്തിൽ സംരക്ഷണഭിത്തി ഉൾപ്പെടെ പണികൾ പൂർത്തിയാക്കിയത്. എന്നാൽ ഭിത്തി ദുർബലമാണെന്ന നാട്ടുകാരുടെ മുന്നറിയിപ്പുകൾ മുമ്പേ തന്നെ ഉയർന്നിരുന്നു.
സംഭവത്തെ തുടർന്ന് ഒന്നര മണിക്കൂറിലധികം മെമു ട്രെയിൻ നിർത്തിവെച്ച ശേഷം നിലമ്പൂരിലേക്ക് തിരിച്ചുവിട്ടു. റെയിൽവേയുടെ ഉന്നത ഉദ്യോഗസ്ഥരും അഗ്നിരക്ഷാസേനയും സ്ഥലത്തെത്തി ട്രാക്കിൽ വീണ മണ്ണും കല്ലും നീക്കം ചെയ്തതോടെ ഗതാഗതം പുനഃസ്ഥാപിച്ചു. രാവിലെ 5.15ന് തുവ്വൂരിൽ എത്തേണ്ട തിരുവനന്തപുരം–നിലമ്പൂർ രാജ്യറാണി എക്സ്പ്രസ് 7.45ഓടെയാണ് കടന്നുപോയത്. മറ്റു ട്രെയിനുകളുടെയും സമയക്രമം ഇതോടെ വൈകി.
