കൊച്ചി: കലൂര് സ്റ്റേഡിയത്തില് നടന്ന അപകടത്തില് പൊലീസിന്റെ വിശദീകരണം തേടി ഹൈക്കോടതി. മൃദംഗ വിഷന് ഉടമ എം നിഗോഷ് കുമാര്, ഓസ്കര് ഇവന്റ് മാനേജ്മെന്റ് ഉടമ ജെനീഷ് പിഎസ് എന്നിവരുടെ മുന്കൂര് ജാമ്യാപേക്ഷകളിലാണ് വിശദീകരണം ഹൈക്കോടതി തേടിയത്. രണ്ട് മുന്കൂര് ജാമ്യാപേക്ഷയും വെള്ളിയാഴ്ച ഹൈക്കോടതി ഒരുമിച്ച് പരിഗണിക്കും.
അതേസമയം സംയുക്ത പരിശോധനാ റിപ്പോര്ട്ടില് വേദിയിലെ സുരക്ഷാ വീഴ്ച്ച സ്ഥിരീകരിച്ചു. പൊലീസും അഗ്നിരക്ഷാസേനയും പൊതുമരാമത്ത് വകുപ്പും നടത്തിയ സംയുക്ത പരിശോധനയിലാണ് ഗുരുതരവീഴ്ച്ച കണ്ടെത്തിയത്. താല്ക്കാലികമായി നിര്മ്മിച്ച വേദിയ്ക്ക് ആവശ്യമായ ബലം ഉണ്ടായിരുന്നില്ലെന്നും സംഘാടകര്ക്ക് ഗുരുതര പിഴവ് സംഭവിച്ചുവെന്നും റിപ്പോര്ട്ടില് പറയുന്നു.
