മുംബൈ: അന്താരാഷ്ട്ര ക്രിക്കറ്റിൽ നിന്ന് വിരമിച്ച മുൻ ഇന്ത്യൻ ക്യാപ്റ്റൻ അജിങ്ക്യ രഹാനെയ്ക്ക് ബിസിസിഐയുടെ പെൻഷൻ ആനുകൂല്യം ലഭിക്കും. വിദേശ പിച്ചുകളിൽ ഇന്ത്യയുടെ വിശ്വസ്ത ബാറ്റർമാരിൽ ഒരാളായിരുന്ന രഹാനെ, 2020-21 ഓസ്ട്രേലിയൻ പര്യടനത്തിൽ ഇന്ത്യയെ ചരിത്രപരമായ ബോർഡർ-ഗാവസ്കർ ട്രോഫി വിജയത്തിലേക്ക് നയിച്ചിരുന്നു.
85 ടെസ്റ്റ് മത്സരങ്ങൾ ഇന്ത്യയ്ക്കായി കളിച്ചിട്ടുള്ള രഹാനെ ബിസിസിഐയുടെ മുൻ താര പെൻഷൻ പദ്ധതിയിലെ ഉയർന്ന സ്ലാബിലാണ് ഉൾപ്പെടുന്നത്. 2022ൽ ബിസിസിഐ പെൻഷൻ തുക പരിഷ്കരിച്ചിരുന്നു. ഇതനുസരിച്ച് 75ലധികം ടെസ്റ്റ് മത്സരങ്ങൾ കളിച്ച താരങ്ങൾക്ക് പ്രതിമാസം 70,000 രൂപയാണ് പെൻഷനായി ലഭിക്കുന്നത്.
മുൻ ബിസിസിഐ പ്രസിഡന്റ് സൗരവ് ഗാംഗുലിയുടെ കാലത്താണ് മുൻ താരങ്ങളുടെ പെൻഷൻ വർധിപ്പിക്കുന്ന തീരുമാനം പ്രഖ്യാപിച്ചത്. വിരമിച്ച താരങ്ങളുടെ സാമ്പത്തിക സുരക്ഷ ഉറപ്പാക്കേണ്ടത് ബോർഡിന്റെ ഉത്തരവാദിത്വമാണെന്ന് അന്ന് ഗാംഗുലി വ്യക്തമാക്കിയിരുന്നു.
രഹാനെ ഇന്ത്യയ്ക്കായി 85 ടെസ്റ്റുകൾക്ക് പുറമെ 90 ഏകദിനങ്ങളും 20 ടി20 മത്സരങ്ങളും കളിച്ചിട്ടുണ്ട്. ക്രിക്കറ്റിൽ നിന്ന് വിരമിച്ച ശേഷമുള്ള ഭാവി പദ്ധതികൾ താരം ഔദ്യോഗികമായി പ്രഖ്യാപിച്ചിട്ടില്ലെങ്കിലും, യുവതാരങ്ങളെ പരിശീലിപ്പിക്കാനും ഉപദേശകനായി പ്രവർത്തിക്കാനും താൽപര്യമുണ്ടെന്ന് സൂചന നൽകിയിട്ടുണ്ട്.
അതേസമയം, ബിസിസിഐയുടെ പെൻഷന് ചില നിബന്ധനകളുണ്ട്. ബോർഡിന് കീഴിൽ ഔദ്യോഗിക ഭരണ ചുമതലയോ പരിശീലക പദവിയോ ഏറ്റെടുത്ത് ശമ്പളം ലഭിക്കുന്ന കാലയളവിൽ പെൻഷൻ തുക താൽക്കാലികമായി നിർത്തിവയ്ക്കും. ഔദ്യോഗിക ചുമതലകൾ അവസാനിച്ചാൽ പെൻഷൻ പുനഃസ്ഥാപിക്കപ്പെടും.
