റാവല്പിണ്ടി: അല്ഖാദിര് ട്രസ്റ്റ് അഴിമതിക്കേസില് മുന് പ്രധാനമന്ത്രി ഇമ്രാന് ഖാന് ശിക്ഷ വിധിച്ച് പാകിസ്താന് കോടതി. ഇമ്രാന് ഖാന് 14 വര്ഷവും പങ്കാളി ബുഷ്റ ബീബിക്ക് ഏഴ് വര്ഷവുമാണ് തടവ് ശിക്ഷ വിധിച്ചിരിക്കുന്നത്. ജഡ്ജ് നാസിര് ജാവേദ് റാണയാണ് വിധി പ്രസ്താവിച്ചത്. വിവിധ കാരണങ്ങള് പറഞ്ഞ് മൂന്ന് തവണ മാറ്റിവെച്ച വിധിയാണ് ഇന്ന് പ്രഖ്യാപിച്ചത്.
കേസുകള് രാഷ്ട്രീയ പ്രേരിതമാണെന്നും അധികാരത്തിലേക്ക് തിരികെ എത്താതിരിക്കാനുള്ള നീക്കമാണെന്നും ഇമ്രാന് ഖാന് പറഞ്ഞു. 200ഓളം കേസുകള് ചുമത്തപ്പെട്ട് 2023 ഓഗസ്റ്റ് മുതല് അദ്ദേഹം കസ്റ്റഡിയിലാണ്. എന്തെങ്കിലും തരത്തിലുള്ള ഇടപെടല് നടത്തുകയോ ആശ്വാസം തേടുകയോ ചെയ്യില്ലെന്ന് ശിക്ഷാ വിധിക്ക് ശേഷം കോടതിക്കുള്ളില് നിന്ന് ഇമ്രാന് ഖാന് മാധ്യമങ്ങളോട് പ്രതികരിച്ചു.
