ന്യൂഡൽഹി: ഇന്ത്യൻ ഒളിമ്പിക് അസോസിയേഷൻ തെരഞ്ഞെടുപ്പിൽ അട്ടിമറിയും ക്രമക്കേടും നടന്നെന്ന പി.ടി. ഉഷയുടെ ആരോപണങ്ങൾക്ക് മറുപടിയുമായി അഞ്ജു ബോബി ജോർജ്. തെരഞ്ഞെടുപ്പിൽ ജയവും തോൽവിയും സ്വാഭാവികമാണെന്നും രണ്ടും ഒരുപോലെ അംഗീകരിക്കാൻ എല്ലാവരും തയ്യാറാകണമെന്നും അഞ്ജു പ്രതികരിച്ചു. ആരോപണങ്ങൾ ഉന്നയിക്കുന്നവർ കൃത്യമായ തെളിവുകൾ ഹാജരാക്കണമെന്നും പരാതിയുണ്ടെങ്കിൽ ബന്ധപ്പെട്ട ഔദ്യോഗിക സംവിധാനങ്ങളെ സമീപിക്കണമെന്നും അവർ വ്യക്തമാക്കി.
ഐഒഎയുടെ ‘സ്പോർട്സ് പേഴ്സൺസ് ഓഫ് ഔട്ട്സ്റ്റാൻഡിങ് മെറിറ്റ്’ (എസ്ഒഎം) തെരഞ്ഞെടുപ്പിൽ 53 വോട്ടുകൾ നേടിയാണ് അഞ്ജു ബോബി ജോർജ് വിജയിച്ചത്. ലഭിച്ച വോട്ടുകൾ കായികരംഗത്ത് ഇതുവരെ നടത്തിയ പ്രവർത്തനങ്ങൾക്കുള്ള വലിയ അംഗീകാരമാണെന്ന് അഞ്ജു പറഞ്ഞു. ആരൊക്കെയാണ് തനിക്ക് വോട്ട് ചെയ്തതെന്ന് മുൻകൂട്ടി പറയാൻ കഴിയില്ലെന്നും അവർ കൂട്ടിച്ചേർത്തു.
അതേസമയം, വരാനിരിക്കുന്ന ഐഒഎ പ്രസിഡന്റ് സ്ഥാനത്തേക്ക് മത്സരിക്കുന്ന കാര്യം അഞ്ജു പൂർണമായി തള്ളിക്കളഞ്ഞിട്ടില്ല. ഇതോടെ ഐഒഎയിലെ നിർണായക സ്ഥാനങ്ങളിലേക്കുള്ള വരുംകാല മത്സരങ്ങളും ശ്രദ്ധേയമാകുകയാണ്.
എസ്ഒഎം തെരഞ്ഞെടുപ്പിൽ 40 വോട്ടുകൾ മാത്രം നേടി അഞ്ചാം സ്ഥാനത്തേക്ക് പിന്തള്ളപ്പെട്ട പി.ടി. ഉഷയ്ക്ക് ഭരണസമിതിയിലെ അംഗത്വവും നഷ്ടമായിരുന്നു. അഞ്ജു ബോബി ജോർജിന് പുറമെ സൈന നെഹ്‌വാൾ, റാണി രാംപാൽ, ഡോള ബാനർജി എന്നിവരും വനിതാ വിഭാഗത്തിൽ നിന്ന് തെരഞ്ഞെടുക്കപ്പെട്ടു.
തെരഞ്ഞെടുപ്പിൽ ക്രമക്കേടുകൾ നടന്നെന്നും വരണാധികാരി പക്ഷപാതപരമായി പെരുമാറിയെന്നും ആരോപിച്ച് പി.ടി. ഉഷ നേരത്തെ അന്താരാഷ്ട്ര ഒളിമ്പിക് കമ്മിറ്റി (ഐഒസി) പ്രസിഡന്റ് കിർസ്റ്റി കോവെൻട്രിക്ക് കത്തയച്ചിരുന്നു. വിഷയത്തിൽ സ്വതന്ത്ര അന്വേഷണം വേണമെന്നായിരുന്നു ഉഷയുടെ ആവശ്യം.
ഉഷയുടെ ആരോപണങ്ങളും അഞ്ജു ബോബി ജോർജിന്റെ മറുപടിയും പുറത്തുവന്നതോടെ ഇന്ത്യൻ ഒളിമ്പിക് അസോസിയേഷനിലെ ആഭ്യന്തര തർക്കം കൂടുതൽ ചർച്ചയാകുകയാണ്.
