കോഴിക്കോട്: ബേപ്പൂർ മണ്ഡലത്തിലെ നിയമസഭാ തെരഞ്ഞെടുപ്പ് ഫലത്തിന് പിന്നാലെ ഉയർന്ന വോട്ട് മറിക്കൽ ആരോപണങ്ങൾ തള്ളിക്കൊണ്ട് യുഡിഎഫ് സ്ഥാനാർത്ഥി പി.വി. അൻവർ രംഗത്തെത്തി. മണ്ഡലത്തിൽ മുസ്ലിം ലീഗ് എൽഡിഎഫിന് വോട്ട് മറിച്ചു എന്ന പ്രചാരണം പൂർണ്ണമായും തെറ്റാണെന്നും ഇത്തരം ആരോപണങ്ങൾ രാഷ്ട്രീയ പ്രേരിതമാണെന്നും അദ്ദേഹം വ്യക്തമാക്കി. തെരഞ്ഞെടുപ്പിൽ യുഡിഎഫിന്റെ വിജയത്തിനായി ഏറ്റവും കൂടുതൽ കഠിനാധ്വാനം ചെയ്തതും തനിക്ക് വലിയ പിന്തുണ നൽകിയതും മുസ്ലിം ലീഗ് പ്രവർത്തകരാണെന്ന് അദ്ദേഹം പറഞ്ഞു.
ലീഗ് പ്രവർത്തകരുടെ ആത്മാർത്ഥതയെ ചോദ്യം ചെയ്യുന്ന രീതിയിലുള്ള പ്രചാരണങ്ങൾ വസ്തുതയ്ക്ക് നിരക്കാത്തതാണെന്നും അദ്ദേഹം കൂട്ടിച്ചേർത്തു.മണ്ഡലത്തിലെ എൽഡിഎഫ് സ്ഥാനാർത്ഥി മുഹമ്മദ് റിയാസിന്റെ വിജയത്തിന് പിന്നിൽ ബിജെപി വോട്ട് മറിച്ചതാണെന്നാണ് പി.വി. അൻവർ പ്രധാനമായും ആരോപിക്കുന്നത്. ബിജെപി വോട്ടുകൾ എൽഡിഎഫിന് അനുകൂലമായി പോൾ ചെയ്യപ്പെട്ടതാണ് ബേപ്പൂരിലെ തെരഞ്ഞെടുപ്പ് ഫലത്തെ വലിയ രീതിയിൽ സ്വാധീനിച്ചത്. ബേപ്പൂരിലുണ്ടായ ഈ അപ്രതീക്ഷിത പരാജയത്തെക്കുറിച്ച് യുഡിഎഫ് ഗൗരവമായി പരിശോധിക്കുമെന്നും വോട്ട് വിഹിതത്തിലുണ്ടായ മാറ്റങ്ങളെക്കുറിച്ച് വരും ദിവസങ്ങളിൽ വിശദമായ പഠനം നടത്തുമെന്നും അദ്ദേഹം വ്യക്തമാക്കി.
തെരഞ്ഞെടുപ്പ് പ്രവർത്തനങ്ങളിൽ മുസ്ലിം ലീഗിന്റെ ഭാഗത്തുനിന്ന് യാതൊരുവിധ വീഴ്ചയും ഉണ്ടായിട്ടില്ലെന്ന് അൻവർ ഉറപ്പിച്ചു പറയുന്നു. ലീഗ് വോട്ടുകൾ എൽഡിഎഫിലേക്ക് പോയി എന്ന പ്രചാരണം അവാസ്തവമാണെന്നും മണ്ഡലത്തിലെ യഥാർഥ രാഷ്ട്രീയ സാഹചര്യം യുഡിഎഫ് നേതൃത്വം വിശദമായി ചർച്ച ചെയ്യുമെന്നും അദ്ദേഹം അറിയിച്ചു. വോട്ട് വിഹിതത്തിലുണ്ടായ ഇടിവും ബിജെപി വോട്ടുകൾ എങ്ങോട്ട് പോയി എന്നതും വരും ദിവസങ്ങളിൽ കൃത്യമായി വിശകലനം ചെയ്യപ്പെടുമെന്ന സൂചനയാണ് പി.വി. അൻവർ നൽകുന്നത്.
