തൃശ്ശൂർ: കുറുക്കൻ പാറ ഗ്രീൻ പാർക്കിൽ പഴയ ട്രെഞ്ചിംഗ് ഗ്രൗണ്ടിന്റെ അവശിഷ്ടങ്ങൾ പതിറ്റാണ്ടുകളായി മണ്ണിലാഴ്ന്നു കിടക്കുകയായിരുന്നു. ശാസ്ത്രീയമായ മാലിന്യ സംസ്കരണം ആരംഭിക്കുന്നതിന് മുൻപ് അടിഞ്ഞുകൂടിക്കിടന്ന ഈ മാലിന്യവും അതിനോടൊപ്പം ചേർന്ന് കിടക്കുന്ന മണ്ണും പൂർണ്ണമായും നീക്കം ചെയ്യുന്നതിനുള്ള ബയോമൈനിങ് പദ്ധതി ഇന്ന് വൈകിട്ട് അഞ്ച് മണിക്ക് ഗ്രീൻ പാർക്കിൽ കുന്നംകുളം നിയമസഭാ അംഗം എ.സി. മൊയ്തീൻ ഉദ്ഘാടനം ചെയ്തു.
ആ പ്രദേശത്ത് താമസിക്കുന്ന ജനങ്ങളെ പൂർണ്ണമായും മാലിന്യ ദുരിതത്തിൽ നിന്ന് മോചിപ്പിക്കുന്നതിനായുള്ള ഈ പദ്ധതി ജനങ്ങൾ ഏറെ സന്തോഷത്തോടെയാണ് സ്വീകരിച്ചത്. കുടിവെള്ളത്തെ പോലും ശുദ്ധീകരിച്ച് വരും തലമുറയെ സമ്പൂർണ്ണ ശുചിത്വത്തിലേക്ക് കൊണ്ടുവരുന്നതിന് സഹായകമായ ഈ പദ്ധതി അതിവേഗം പൂർത്തീകരിക്കണമെന്നും, ഇതിലൂടെ പുനർനിർമിക്കപ്പെടുന്ന ഗ്രൗണ്ട് ഈ പ്രദേശത്തെ ചെറുപ്പക്കാർക്ക് കായിക വിനോദങ്ങൾക്ക് ഉപയോഗപ്പെടുത്തണമെന്നും നിയമസഭാ അംഗം എ.സി. മൊയ്തീൻ ആവശ്യപ്പെട്ടു. നഗരസഭ ചെയർമാൻ സൗമ്യ അനിലൻ, വൈസ് ചെയർമാൻ പി.ജി. ജയപ്രകാശ്, സ്റ്റാൻഡിങ് കമ്മിറ്റി ചെയർമാൻമാർ, നഗരസഭ സെക്രട്ടറി കെ.കെ. മനോജ് എന്നിവർ ചടങ്ങിൽ പങ്കെടുത്തു
