കൊച്ചി: വിഴിഞ്ഞം അന്താരാഷ്ട്ര തുറമുഖ പദ്ധതിയുമായി ബന്ധപ്പെട്ട് വിഴിഞ്ഞം തുറമുഖത്തെ ബാലരാമപുരം റെയില്വേ സ്റ്റേഷനുമായി ബന്ധിപ്പിക്കുന്ന ഭൂഗര്ഭ റെയില്പാത നിര്മിക്കുന്നതിന് മന്ത്രിസഭായോഗം അനുമതി നല്കി. കൊങ്കണ് റെയില് കോര്പ്പറേഷന് ലിമിറ്റഡ് (KRCL) തയ്യാറാക്കിയ ഡിറ്റെയ്ല്ഡ് പ്രോജക്ട് റിപ്പോര്ട്ട് (DPR)നാണ് അനുമതി നല്കിയത്. കൊങ്കണ് റെയില് കോര്പ്പറേഷനാണ് പദ്ധതിയുടെ നിര്മാണച്ചുമതല.
പദ്ധതിയ്ക്കായി പള്ളിച്ചല്, ബാലരാമപുരം, അതിയന്നൂര് വില്ലേജുകളിലായി 4.697 ഹെക്ടര് ഭൂമി ഏറ്റെടുക്കും. ബാലരാമപുരത്തുനിന്ന് വിഴിഞ്ഞത്തേക്ക് 10.7 കിലോമീറ്ററാണ് റെയില്പ്പാത നിര്മിക്കേണ്ടത്. ഇതില് 9.5 കിലോമീറ്റര് ഭൂഗര്ഭപാതയാണ്. 1482.92 കോടി രൂപയുടെ പദ്ധതിക്കാണ് ഭരണാനുമതി നല്കിയത്. 2028 ഡിസംബറില് റെയില് പാത ഗതാഗതയോഗ്യമാക്കുകയാണ് ലക്ഷ്യം.
