കൊച്ചി: കളമശ്ശേരി ഗവ. പോളിടെക്നിക്കില് കഞ്ചാവ് എത്തിച്ച ഇതര സംസ്ഥാനക്കാരായ രണ്ട പേർ പിടിയിൽ. അഹിന്ത മണ്ഡല്, സുഹൈല് എന്നിവരാണ് അറസ്റ്റിലായത്. നാല് പാക്കറ്റ് കഞ്ചാവ് എത്തിച്ചത് ഇവരാണെന്ന് പോലീസ് പറയുന്നു. കളമശ്ശേരി പോലീസിനും ഡാന്സാഫിനും ലഭിച്ച രഹസ്യവിവരത്തെത്തുടര്ന്ന് വ്യാഴാഴ്ച രാത്രിയാണ് കോളേജ് ഹോസ്റ്റലില് റെയ്ഡ് നടന്നത്.
ഇവിടുത്തെ മുറികളില് നടത്തിയ പരിശോധനയില്, ഒരു മുറിയില്നിന്ന് മാത്രം 1.9 കിലോ കഞ്ചാവും മറ്റൊരു മുറിയില്നിന്ന് ഒമ്പതുഗ്രാം കഞ്ചാവും പിടികൂടി. കൊല്ലം സ്വദേശിയായ ആകാശിന്റെ മുറിയില്നിന്നാണ് 1.9 കിലോ കഞ്ചാവ് കണ്ടെത്തിയത്. ആലപ്പുഴ സ്വദേശിയായ ആദിത്യന്, കൊല്ലം സ്വദേശിയായ അഭിരാജ് എന്നിവരുടെ മുറിയില്നിന്നാണ് ഒമ്പതുഗ്രാം കഞ്ചാവ് പിടികൂടിയത്.
