കൊച്ചി: ചേന്ദമംഗലം കൂട്ടക്കൊലപാതക കേസില് പ്രതി ഋതു ജയനെ റിമാന്ഡ് ചെയ്തു. പ്രതിയുടെ കസ്റ്റഡി കാലാവധി ഇന്നോടെ അവസാനിച്ചിരുന്നു. പിന്നാലെയാണ് പറവൂര് മജിസ്ട്രേറ്റ് കോടതി റിമാന്ഡ് ചെയ്യാനുളള ഉത്തരവ് നല്കിയത്. കോടതി അഞ്ച് ദിവസത്തെ കസ്റ്റഡിയാണ് വടക്കേക്കര പൊലീസിന് നല്കിയിരുന്നത്. കൊലപാതകം നടന്ന വീട്ടിലെത്തിച്ച് ഇന്നലെ ഋതുവിന്റെ തെളിവെടുപ്പ് നടത്തിയിരുന്നു.
ജനരോഷം ഉണ്ടാകുമെന്ന സൂചനയില് അതിരാവിലെ ആയിരുന്നു തെളിവെടുപ്പ്. ആറും പതിനൊന്നും വയസ്സുള്ള പെണ്കുട്ടികളാണ് കേസിലെ പ്രധാന സാക്ഷികള്. കുട്ടികളുടെ മൊഴി കഴിഞ്ഞദിവസം പൊലീസ് രേഖപ്പെടുത്തിയിരുന്നു. ആക്രമണത്തില് കൊല്ലപ്പെട്ട വിനിഷയുടെ മക്കള് ഋതുവിനെ തിരിച്ചറിഞ്ഞു. ചികിത്സയിലുള്ള ജിതിന് വെന്റിലേറ്ററില് തുടരുകയാണ്.
