ബൂസാന്: ചൈനയുമായി വ്യാപാര കരാറില് ധാരണയിലെത്തിയതായി അമേരിക്ക. ദക്ഷിണ കൊറിയയിലെ ബൂസാനില് വച്ച് ചൈനീസ് പ്രസിഡന്റ് ഷി ജിന്പിങ്ങുമായുള്ള കൂടിക്കാഴ്ചയെ വിസ്മയകരമായ ഒന്ന് എന്നാണ് അമേരിക്കന് പ്രസിഡന്റ് ഡോണള്ഡ്് ട്രംപ് വിശേഷിപ്പിച്ചത്.
അതിശയിപ്പിക്കുന്ന പുതിയ തുടക്കങ്ങള് ഉണ്ടാവുമെന്നാണ് അമേരിക്ക ചൈന ബന്ധത്തേക്കുറിച്ച് വ്യാഴാഴ്ച ഡോണള്ഡ്് ട്രംപ് പ്രതികരിച്ചത്. തീരുവയില് 10 ശതമാനം കുറവും വരുത്തിയാണ് വ്യാപാര കരാറില് ഏര്പ്പെട്ടതെന്നാണ് അന്തര് ദേശീയ മാധ്യമങ്ങള് റിപ്പോര്ട്ട് ചെയ്യുന്നത്. ബൂസാനില് അടച്ചിട്ട മുറിയില് രണ്ട് മണിക്കൂറാണ് ഇരു നേതാക്കളും തമ്മിലുള്ള കൂടിക്കാഴ്ച നീണ്ടത്. നിരവധി തീരുമാനങ്ങള് എടുത്തതായാണ് ട്രംപ് കൂടിക്കാഴ്ചയ്ക്ക് പിന്നാലെ പ്രതികരിച്ചത്.
പ്രാധാന്യമുള്ള നിരവധി കാര്യങ്ങളില് തീരുമാനത്തിലെത്തിയെന്നും അവ ഉടന് തന്നെ പ്രഖ്യാപിക്കുമെന്നും ട്രംപ് വിശദമാക്കി. എല്ലാകാര്യവും സംസാരിച്ചതായി പറയാന് സാധിക്കില്ല. എങ്കിലും മികച്ച കൂടിക്കാഴ്ചയാണ് നടന്നത്. ചൈനയ്ക്ക് മേലുള്ള തീരുവ 57 ശതമാനത്തില് നിന്ന് 47 ശതമാനമായി കുറയ്ക്കുമെന്നും ട്രംപ് പ്രതികരിച്ചു.
