മൂന്നാറിലെ തോട്ടം തൊഴിലാളികൾക്കൊപ്പം ആടിയും പാടിയും സമയം ചെലവഴിക്കുന്ന തമിഴ് സൂപ്പർതാരം ചിയാൻ വിക്രമിൻറെ വിഡിയോ സോഷ്യൽ മീഡിയയിൽ തരംഗമാകുന്നു. തേയിലത്തോട്ടത്തിനിടയിലൂടെയുള്ള നടത്തത്തിനിടയിലാണ് താരം അവിടെ ജോലി ചെയ്യുകയായിരുന്ന തൊഴിലാളികളെ കാണുന്നതും അവർക്കരികിലേക്ക് എത്തുന്നതും. ‘ഒരു നടത്തത്തിന് പോയി, ഒരുപാട് ഓർമകളുമായി തിരിച്ചുവന്നു’ എന്ന അടിക്കുറിപ്പോടെ വിക്രം തന്നെയാണ് ഈ ഹൃദ്യമായ വിഡിയോ തൻറെ ഇൻസ്റ്റഗ്രാം പേജിലൂടെ പങ്കുവെച്ചത്.
താരത്തെ നേരിൽ കണ്ട സന്തോഷത്തിൽ ഫോട്ടോ എടുത്തോട്ടെ എന്ന് ചോദിച്ച തൊഴിലാളികളോട്, ‘ഫോട്ടോ ഒന്നും എടുക്കാൻ പറ്റില്ല’ എന്ന് വിക്രം തമാശരൂപേണ പറയുന്നതും വിഡിയോയിലുണ്ട്. എന്നാൽ തൊട്ടടുത്ത നിമിഷം തന്നെ എല്ലാവരെയും സ്നേഹത്തോടെ അടുത്തേക്ക് വിളിച്ച് അദ്ദേഹം ഫോട്ടോയ്ക്ക് പോസ് ചെയ്യുകയായിരുന്നു. വിക്രമിൻറെ സിനിമകളിലെ പ്രിയപ്പെട്ട കഥാപാത്രങ്ങളുടെ പേരുകൾ സ്ത്രീകൾ വിളിച്ചുപറയുന്നതും വിഡിയോയിൽ കേൾക്കാം. ഒടുവിൽ ആരാധകരുടെ അഭ്യർത്ഥന മാനിച്ച്, തൻറെ സൂപ്പർഹിറ്റ് ചിത്രമായ ‘അന്യനിലെ’ ‘അണ്ടാങ്കാക്ക കൊണ്ടാകാരി’ എന്ന പ്രശസ്തമായ ഗാനം തൊഴിലാളികൾക്കൊപ്പം പാടുകയും അവർക്കൊപ്പം ചുവടുവെക്കുകയും ചെയ്ത ശേഷമാണ് താരം അവിടെനിന്ന് മടങ്ങിയത്. വിക്രമിൻറെ ലളിതമായ പെരുമാറ്റത്തെ പ്രകീർത്തിച്ച് നിരവധി പേരാണ് വിഡിയോയ്ക്ക് താഴെ കമന്റുകളുമായി രംഗത്തെത്തുന്നത്.
