കർണാടക : കർണാടകയിൽ പിടിമുറുക്കി കോവിഡ്. 40 കോവിഡ് -19 കേസുകളാണ് ഇന്നലെ മാത്രം സംസ്ഥാനത്ത് റിപ്പോർട്ട് ചെയ്തത്. ഇതോടെ സംസ്ഥാനത്ത് സജീവ കേസുകളുടെ എണ്ണം 126 ആയി ഉയർന്നതായി ആരോഗ്യവകുപ്പ് അറിയിച്ചു. കഴിഞ്ഞ 24 മണിക്കൂറിനുള്ളിൽ പോസിറ്റീവ് നിരക്ക് 10.12 ശതമാനമാണെങ്കിലും, കഴിഞ്ഞ 24 മണിക്കൂറിനുള്ളിൽ കർണാടകയിൽ നടത്തിയ ആകെ പരിശോധനകൾ 395 ആണ്.
അതേസമയം കോവിഡ് കേസുകൾ വർധിക്കുന്ന സാഹചര്യത്തിൽ ഓക്സിജൻ സിലിണ്ടറുകൾ, അടിയന്തര ഐസിയു കിടക്കകൾ, വെന്റിലേറ്ററുകൾ, മാസ്കുകൾ, മറ്റ് കോവിഡുമായി ബന്ധപ്പെട്ട ഉപകരണങ്ങൾ എന്നിവയുടെ ലഭ്യതയും ഗുണനിലവാരവും പരിശോധിച്ചതായി കർണാടക ആരോഗ്യമന്ത്രി ദിനേശ് ഗുണ്ടു റാവു മല്ലേശ്വരത്തെ കെസി ജനറൽ ആശുപത്രി സന്ദർശിച്ച ശേഷം മാധ്യമങ്ങളോട് വ്യക്തമാക്കി. കൂടാതെ പൊതുജന സഹായത്തിനായി ഒരു പ്രത്യേക കോവിഡ് -19 ഹെൽപ്പ് ലൈൻ ഉടൻ ആരംഭിക്കുമെന്നും അദ്ദേഹം പറഞ്ഞു.
