ലിസ്ബൺ: യുവേഫ നേഷൻസ് ലീഗിൽ ഡെന്മാർക്കിനെതിരായ നിർണ്ണായക പോരാട്ടത്തിന് തൊട്ടുമുമ്പ് പോർച്ചുഗൽ ദേശീയ ടീമിന്റെ പരിശീലന ക്യാമ്പ് വിട്ട് സൂപ്പർ താരം ക്രിസ്റ്റ്യാനോ റൊണാൾഡോ. പരിശീലകൻ ഹോർഗെ ജീസസിന്റെ വാർത്താസമ്മേളനത്തിന് തൊട്ടുപിന്നാലെ ഇൻസ്റ്റാഗ്രാമിലൂടെയാണ് ക്യാമ്പ് വിടുകയാണെന്ന അപ്രതീക്ഷിത പ്രഖ്യാപനം താരം നടത്തിയത്. ദേശീയ ടീമിൽ നിന്ന് താൻ പുറത്തുപോകാനുണ്ടായ യഥാർത്ഥ കാരണം ഉചിതമായ സമയത്ത് പോർച്ചുഗലിലെ ജനങ്ങൾക്ക് മുന്നിൽ വെളിപ്പെടുത്തുമെന്നും റൊണാൾഡോ തുറന്നടിച്ചു. ക്രിസ്റ്റ്യാനോ ക്യാമ്പ് വിട്ടതായും ശേഷിക്കുന്ന 24 കളിക്കാരുമായി മത്സരത്തിനുള്ള ഒരുക്കങ്ങൾ തുടരുമെന്നും പോർച്ചുഗീസ് ഫുട്ബോൾ ഫെഡറേഷൻ (എഫ്പിഎഫ്) ഔദ്യോഗികമായി സ്ഥിരീകരിച്ചു.
കഴിഞ്ഞ ഞായറാഴ്ച നോർവേയ്‌ക്കെതിരായ മത്സരത്തിൽ 2-1 ന് പോർച്ചുഗൽ വിജയിച്ചെങ്കിലും റൊണാൾഡോയെ പകരക്കാരുടെ ബെഞ്ചിലിരുത്തി മുഴുവൻ സമയവും കളിപ്പിക്കാതിരുന്നതാണ് ഭിന്നതകളുടെ തുടക്കം. റൊണാൾഡോയ്ക്ക് പകരം കളത്തിലിറങ്ങിയ ഗോൺസാലോ റാമോസ് അന്ന് ഗോൾ നേടുകയും ചെയ്തിരുന്നു. ഇരുപത്തിമൂന്ന് വർഷം നീണ്ട അന്താരാഷ്ട്ര കരിയറിൽ 234 മത്സരങ്ങളിൽ കളത്തിലിറങ്ങി റെക്കോർഡിട്ട ക്രിസ്റ്റ്യാനോയെ ചരിത്രത്തിൽ മൂന്നാം തവണ മാത്രമാണ് പോർച്ചുഗൽ ഒരു മത്സരത്തിൽ ഉപയോഗിക്കാതെ മാറ്റിനിർത്തുന്നത്.
തുടർച്ചയായി മത്സരങ്ങൾ വരുമ്പോൾ റൊണാൾഡോയുടെ കായികക്ഷമത പരിഗണിച്ച് വിശ്രമം നൽകാൻ ധാരണയുണ്ടായിരുന്നുവെന്നാണ് കോച്ച് ജോർജെ ജീസസിന്റെ വാദം. ദീർഘനേരം വാമപ്പ് ചെയ്യിപ്പിച്ച ശേഷം കളത്തിലിറക്കാതിരുന്നത് പിഴവാണെന്ന് സമ്മതിച്ചെങ്കിലും ടീമിലെ അന്തിമ തീരുമാനം എടുക്കാനുള്ള പൂർണ്ണ അധികാരം തനിക്കാണെന്ന് ജീസസ് വ്യക്തമാക്കി. ആര് കളിക്കണമെന്ന് തീരുമാനിക്കുന്നത് പരിശീലകനാണെന്നും കളിക്കാർ തനിക്ക് മേൽ തീരുമാനങ്ങൾ അടിച്ചേൽപ്പിക്കാൻ അനുവദിക്കില്ലെന്നും അദ്ദേഹം വാർത്താസമ്മേളനത്തിൽ ഉറപ്പിച്ചു പറഞ്ഞു. ഇതിന് തൊട്ടുപിന്നാലെയാണ് ക്യാമ്പ് വിടാനുള്ള തീരുമാനം റൊണാൾഡോ ഇൻസ്റ്റാഗ്രാമിലൂടെ പരസ്യമാക്കിയത്. ഇതോടെ താരത്തിന്റെ അന്താരാഷ്ട്ര കരിയറും അവസാനിക്കുകയാണോ എന്ന സംശയമാണ് ബലപ്പെടുന്നത്.
