മലപ്പുറം: മലപ്പുറം ജില്ലയിൽ എൽ.ഡി.എഫിന് ലഭിച്ച ഏക നഗരസഭയായ പൊന്നാനിയിൽ സി.വി. സുധ നഗരസഭ ചെയർപേഴ്സൻ
ആയേക്കും. തുടർച്ചയായി മൂന്നാം തവണയാണ് സി.വി. സുധ നഗരസഭ
കൗൺസിലറാകുന്നത്. കുട്ടാട് വാർഡിൽ നിന്ന് 121 വോട്ടിന്റെ
ഭൂരിപക്ഷവുമായാണ് സുധ ഇക്കുറി ജയിച്ചത്. ചെയർ പേഴ്സൻ സി .വി സുധ ആകുമെന്നാണ് സി.പി.എം വൃത്തങ്ങൾ നൽകുന്ന സൂചന. അതേസമയം മൂന്ന്
തവണ വിജയിക്കുകയും സ്ഥിരം സമിതി അധ്യക്ഷരാവുകയും ചെയ്തിരുന്ന
റീന പ്രകാശൻ, ഷീന സുദേശൻ എന്നിവർക്കും സാധ്യതയുണ്ട്.
വാർഡ് 28 പള്ളപ്രം വാർഡിൽ നിന്ന് ബി.ജെ.പിക്കെതിരെ 26 വോട്ടിന്റെ
ഭൂരിപക്ഷമാണ് റീന പ്രകാശന് ലഭിച്ചത്. 2015 ഭരണസമിതിയിൽ പൊതുമരാമത്ത് സ്ഥിരം സമിതി അധ്യക്ഷയായിരുന്നു റീന. ഉറൂബ് നഗർ വാർഡിൽ നിന്ന് 252 വോട്ടിന്റെ ഭൂരിപക്ഷത്തിലാണ് ഷീന സുദേശൻ വിജയിച്ചത്.
2015, 2020 ഭരണ സമിതികളിൽ സ്ഥിരം സമിതി അധ്യക്ഷയായിരുന്നു ഷീന.
മുൻ ഡെപ്യൂട്ടി തഹസിൽദാർ പി. ഷംസുദ്ദീൻ, സി.പി. സക്കീർ എന്നിവരിൽ ഒരാൾ
വൈസ് ചെയർമാൻ ആകുമെന്നാണ് സൂചനകൾ.
