നീണ്ട 12 വർഷങ്ങൾക്കുശേഷം ഇന്ത്യയ്ക്കെതിരായ ടി20 പരമ്പര സ്വന്തമാക്കി ഇംഗ്ലണ്ട്. നാലാം മത്സരത്തിൽ ഒമ്പത് വിക്കറ്റിന്റെ തകർപ്പൻ വിജയമാണ് ഇംഗ്ലീഷ് പട കുറിച്ചത്. ഇതോടെ, ഒരു മത്സരം ബാക്കിനിൽക്കേ ഇംഗ്ലണ്ട് പരമ്പരയിൽ 3-0 ന് മുന്നിലെത്തി. പരമ്പരയിലെ ഒരു മത്സരം മഴമൂലം ഉപേക്ഷിച്ചിരുന്നു. ഇന്ത്യയുടെ തുടർച്ചയായ രണ്ടാം ടി20 പരമ്പര തോൽവിയാണിത്. ഇതിന് തൊട്ടുമുമ്പ് അയർലൻഡിനോടും ഇന്ത്യ പരമ്പര തോറ്റിരുന്നു.
മത്സരത്തിൽ ടോസ് നേടി ആദ്യം ബാറ്റിങ്ങിനിറങ്ങിയ ഇന്ത്യയ്ക്ക് നിശ്ചിത 20 ഓവറിൽ 7വിക്കറ്റ് നഷ്ടത്തിൽ 158 റൺസെടുക്കാനേ സാധിച്ചുള്ളൂ. എന്നാൽ, മറുപടി ബാറ്റിങ്ങിൽ ഇന്ത്യൻ ബൗളർമാരെ അക്ഷരാർത്ഥത്തിൽ തല്ലിച്ചതച്ച ഇംഗ്ലണ്ട് വെറും 13.5 ഓവറിൽ ലക്ഷ്യം കണ്ടു.
നായകനായി ചുമതലയേറ്റ ശേഷം ഒരു മത്സരത്തിൽ പോലും ടീമിനെ വിജയത്തിലേക്ക് നയിക്കാൻ കഴിഞ്ഞിട്ടില്ല എന്ന നാണക്കേടും ഇതോടെ ശ്രേയസ് അയ്യരെ തേടിയെത്തി. നയിച്ച ആദ്യ അഞ്ചു മത്സരങ്ങളിൽ ഒന്നിൽപ്പോലും ജയിക്കാനാകാത്ത ആദ്യ ഇന്ത്യൻ ക്യാപ്റ്റൻ എന്ന നാണക്കേടിന്റെ റെക്കോർഡും അയ്യരുടെ പേരിലായി.
