കോഴിക്കോട്:പന്തീരാങ്കാവില് നവവധുവിനെ ഭര്തൃഗൃഹത്തില് മര്ദ്ദിച്ച സംഭവത്തില് പ്രതി രാഹുല് വിവാഹ തട്ടിപ്പ് വീരനെന്ന് സംശയം.മുമ്പും വിവാഹങ്ങള് രജിസ്റ്റര് ചെയ്തിരുന്നതായുള്ള തെളിവുകളുമായി രാഹുലുമായി വിവാഹം ഉറപ്പിച്ച പെണ്കുട്ടികള് പൊലീസില് പരാതി നല്കിയിരിക്കുകയാണ്.നിയമപരമായി വിവാഹമോചനം നേടും മുമ്പാണ് പറവൂരിലെ പെണ്കുട്ടിയുമായുള്ള വിവാഹം നടന്നത്. ബഹുഭാര്യത്വം ചൂണ്ടിക്കാണിച്ചാണ് യുവതിയുടെ പിതാവ് പരാതി നല്കിയിരിക്കുന്നത്.മുന് വിവാഹങ്ങളുടെ വിവരം രാഹുലിന്റെ കുടുംബം മറച്ചുവെച്ചെന്ന് യുവതിയുടെ പിതാവ് ആരോപിച്ചു.കോട്ടയത്തും എറണാകുളത്തും വിവാഹങ്ങള് രജിസ്റ്റര് ചെയ്തിരുന്നതായാണ് വിവരം. രജിസ്റ്റര് ചെയ്ത പെണ്കുട്ടി രാഹുലിന്റെ സ്വഭാവ വൈകല്യം മനസ്സിലാക്കിയതോടെ വിവാഹ മോചനം തേടുകയായിരുന്നു.
മെയ് 5-ന് എറണാകുളത്ത് വെച്ചായിരുന്നു ഇവരുടെ വിവാഹം.പറവൂര് സ്വദേശിനിയായ നവവധുവാണ് കോഴിക്കോട് പന്തീരാങ്കാവിലെ ഭര്തൃവീട്ടില് ക്രൂരമായ ഗാര്ഹിക പീഡനത്തിന് ഇരയായത്. എറണാകുളത്ത് നിന്ന് വിവാഹ സല്ക്കാരചടങ്ങിന് എത്തിയ ബന്ധുക്കളാണ് യുവതിയുടെ ശരീരത്തിലെ പരിക്കുകള് കണ്ടത്.വീട്ടുകാര് യുവതിയുടെ മുഖത്തും കഴുത്തിലും മര്ദനമേറ്റതിന്റെ പാടുകള് കണ്ട് കാര്യം തിരക്കിയപ്പോഴാണ് മര്ദന വിവരം പുറത്തറിഞ്ഞത്.വിഷയം വിവാദമായതോടെയാണ് സംഭവത്തില് ഭര്ത്താവ് രാഹുലിനെതിരെ വധശ്രമത്തിന് പൊലീസ് കേസെടുത്തത്.
