തിരുവനന്തപുരം: പ്രശസ്ത ഹൃദ്രോഗ വിദഗ്ധനും കേരളത്തിലെ ആധുനിക ഹൃദ്രോഗ ചികിത്സാ രംഗത്തെ പ്രമുഖനുമായ പ്രൊഫ. ഡോ. ജി. വിജയരാഘവൻ അന്തരിച്ചു. ഇന്ത്യയിൽ 2D എക്കോകാർഡിയോഗ്രാഫി സാങ്കേതികവിദ്യ പരിചയപ്പെടുത്തുന്നതിൽ പ്രധാന പങ്കുവഹിച്ച വ്യക്തിയാണ് അദ്ദേഹം.
1970കളുടെ അവസാനത്തിൽ ഇന്ത്യയിൽ 2D എക്കോകാർഡിയോഗ്രാഫി മെഷീൻ അവതരിപ്പിച്ച് ഹൃദ്രോഗ നിർണയത്തിന് ഉപയോഗിച്ച ആദ്യകാല വിദഗ്ധരിൽ ഒരാളായിരുന്നു ഡോ. വിജയരാഘവൻ. തിരുവനന്തപുരം ഗവൺമെന്റ് മെഡിക്കൽ കോളേജിലെ കാർഡിയോളജി വിഭാഗം മേധാവിയായും പ്രൊഫസറായും ദീർഘകാലം സേവനമനുഷ്ഠിച്ചു.
കിംസ് ഹെൽത്ത് ആശുപത്രിയുടെ വൈസ് ചെയർമാനും കാർഡിയോളജി വിഭാഗം മേധാവിയുമായി പ്രവർത്തിച്ചുവരികയായിരുന്നു. സ്വകാര്യ മേഖലയിൽ ആധുനിക ഹൃദ്രോഗ ചികിത്സ കുറഞ്ഞ ചെലവിൽ ലഭ്യമാക്കുന്നതിലും അദ്ദേഹത്തിന്റെ പ്രവർത്തനങ്ങൾ നിർണായകമായി.
ആരോഗ്യ മേഖലയിലെ സമഗ്ര സംഭാവനകൾ പരിഗണിച്ച് ഭാരത സർക്കാർ അദ്ദേഹത്തെ പത്മശ്രീ നൽകി ആദരിച്ചിരുന്നു. കാർഡിയോളജിക്കൽ സൊസൈറ്റി ഓഫ് ഇന്ത്യ ഉൾപ്പെടെയുള്ള വിവിധ ദേശീയ, അന്തർദേശീയ മെഡിക്കൽ സംഘടനകളിൽനിന്ന് നിരവധി പുരസ്കാരങ്ങളും ഫെലോഷിപ്പുകളും അദ്ദേഹത്തിന് ലഭിച്ചിട്ടുണ്ട്.
