കോഴിക്കോട്: ചുങ്കം മേഖലയിൽ വ്യാപിച്ചു വരുന്ന മയക്കുമരുന്ന് വിൽപ്പന സംഘങ്ങളെ തുരത്താനായി താമരശ്ശേരി ചുങ്കത്ത് ലഹരി വിരുദ്ധ ജനകീയ സമിതി രൂപീകരിച്ചു. ചുങ്കം ജംഗ്ഷൻ, കൂടത്തായി റോഡ്, ചെക്ക് പോസ്റ്റ്, കത്തീഡ്രൽ ചർച്ചിന് മുൻവശം, ചാവറ റോഡ്, മിനി ബൈപ്പാസ് എന്നിവിടങ്ങൾ കേന്ദ്രീകരിച്ച് രാപ്പകൽ ഭേദമന്യേ മയക്കുമരുന്ന് വിൽപ്പന പൊടിപൊടിക്കുകയാണ്.
ജില്ലയുടെ വിവിധ ഭാഗങ്ങളിൽ നിന്നും വന്ന് താമരശ്ശേരിയിലെ ലോഡ്ജുകളിൽ തമ്പടിച്ച് സ്ത്രീകളടക്കമുള്ള സംഘങ്ങളാണ് മയക്കുമരുന്ന് വിതരണ നടത്തുന്നത്. പ്രാദേശികമായി ചിലരുടെ സഹായവും ഇവർക്ക് ലഭിക്കുന്നുണ്ട്. ഭാവി തലമുറയെ തന്നെ നശിപ്പിക്കുന്ന ഇത്തരം സംഘങ്ങളെ നാട്ടിൽ നിന്നും തുരത്താനാണ് ജനകീയ പ്രതിരോധ സമിതിക്ക് രൂപം നൽകിയത്.
മഹല്ലു കമ്മിറ്റി, അമ്പല കമ്മിറ്റി, രാഷ്ട്രീയ പാർട്ടി പ്രതിനിധികൾ, വാർഡ് മെമ്പർമാർ വ്യാപാരികൾ, സന്നദ്ധ സംഘടന പ്രതിനിധികൾ, ഓട്ടോ തൊഴിലാളികൾ, യുവജന സംഘടന ഭാരവാഹികൾ തുടങ്ങി നിരവധി പേർ കമ്മിറ്റി രൂപീകരണ യോഗത്തിൽ പങ്കെടുത്തു.
