മലപ്പുറം: തദ്ദേശ തെരഞ്ഞെടുപ്പിന്റെ ഭാഗമായി തവനൂർ ഗ്രാമപഞ്ചായത്തിലെ 42 പോളിംഗ് ബൂത്തുകൾ ഹരിത ബൂത്തുകളാക്കി മാറ്റുന്നു. പ്രകൃതി സൗഹൃദ സാമഗ്രികളുടെ ഉപയോഗത്തോടെ മാലിന്യ സംസ്കരണ സംവിധാനങ്ങൾ ഒരുക്കുന്ന പ്രവൃത്തി ആരംഭിച്ചു.

ഹരിത കർമ്മ സേനയുടെ നേതൃത്വത്തിൽ ഓലകൊണ്ട് നിർമ്മിച്ച കൊട്ടകൾ മാലിന്യ ശേഖരണത്തിനായി ബൂത്തുകളിൽ സ്ഥാപിക്കും. കുറ്റിപ്പുറം എം.ഇ.എസ് എഞ്ചിനിയറിംഗ് കോളേജിൽ ബൂത്തുകളുടെ ഹരിത ഒരുക്കങ്ങൾ നടന്നു. പഞ്ചായത്ത് സെക്രട്ടറി ടി. അബ്ദുൾ സലീം, അസിസ്റ്റന്റ് സെക്രട്ടറി വി.എം. സജി, സി. ഭരതൻ, ഡോ. പി.യു. സുനീഷ് എന്നിവർ നേതൃത്വം നൽകി. ഹരിത കർമ്മ സേന അംഗങ്ങളും എം.ഇ.എസ് കോളേജ് എൻ.എസ്.എസ് വളണ്ടിയേഴ്സും പ്രവർത്തനങ്ങളിൽ പങ്കെടുത്തു.