കോട്ടയം: കൊട്ടാരമറ്റം സബ് ടെർമിനലിലെ യാത്രക്കാരുടെ വർഷങ്ങളായുള്ള പരാതിക്ക് പരിഹാരമായി. സ്റ്റാൻഡിൽ സ്ഥാപിച്ചിരുന്നിട്ടും പ്രവർത്തിക്കാതിരുന്ന എട്ടു ഫാനുകളാണ് നന്നാക്കി പ്രവർത്തനസജ്ജമാക്കിയത്. കഠിനമായ ചൂടിൽ ബസ് കാത്തുനിൽക്കുന്ന യാത്രക്കാർ അനുഭവിക്കുന്ന ദുരിതം നേരിൽക്കണ്ട വ്യാപാരികളും യാത്രക്കാരും നൽകിയ നിവേദനത്തെത്തുടർന്നാണ് നഗരസഭയുടെ അടിയന്തര ഇടപെടലുണ്ടായത്.
വാർഡ് കൗൺസിലർ ബിജു മാത്യുവിന്റെ നേതൃത്വത്തിൽ മുനിസിപ്പൽ ജീവനക്കാർ ഇന്നലെ രാത്രിയോടെയെത്തിയാണ് അറ്റകുറ്റപ്പണികൾ പൂർത്തിയാക്കിയത്. ഫാനുകൾ പ്രവർത്തനക്ഷമമാക്കിയതിനു പുറമെ, ബസ് സ്റ്റാൻഡ് പരിസരത്ത് കുന്നുകൂടിക്കിടന്ന മാലിന്യങ്ങൾ നീക്കം ചെയ്ത് ശുചീകരണ പ്രവർത്തനങ്ങളും നടത്തി.
എട്ടു വർഷമായി അധികൃതർ കാട്ടിയ അവഗണനയ്ക്ക് ഇതോടെ അവസാനമായിരിക്കുകയാണ്. നഗരസഭയുടെ ഈ വേഗത്തിലുള്ള ഇടപെടലിൽ യാത്രക്കാരും വ്യാപാരികളും സന്തോഷം പ്രകടിപ്പിച്ചു.
