ജമ്മു: ജമ്മു കശ്മീരിലെ അഖ്നൂർ മാർക്കറ്റിൽ ശനിയാഴ്ച പുലർച്ചെയുണ്ടായ വൻ തീപിടിത്തത്തിൽ മൂന്ന് കടകൾ പൂർണ്ണമായി കത്തിനശിച്ചു. രണ്ട് ഹാർഡ്വെയർ കടകളും ഒരു മിഠായിക്കടയുമാണ് തീയിൽ തകർന്നത്.
കടകളിൽ സൂക്ഷിച്ചിരുന്ന ലക്ഷക്കണക്കിന് രൂപയുടെ സാധനസാമഗ്രികളും ഫർണിച്ചറുകളും തീപിടിത്തത്തിൽ നശിച്ചതായി ഉദ്യോഗസ്ഥരും ദൃക്സാക്ഷികളും അറിയിച്ചു. ഹാർഡ്വെയർ കടകളിൽ ഉണ്ടായിരുന്ന പെയിന്റ്, രാസവസ്തുക്കൾ എന്നിവ തീപിടിത്തം വേഗത്തിൽ പടരാൻ കാരണമായതായി പറയുന്നു.
തീ ആളിപ്പടർന്നതോടെ പ്രദേശവാസികളും വ്യാപാരികളും ചേർന്ന് പ്രാഥമികമായി തീ നിയന്ത്രിക്കാൻ ശ്രമിച്ചെങ്കിലും വിജയിച്ചില്ല. തുടർന്ന് സ്ഥലത്തെത്തിയ ഫയർ ആൻഡ് എമർജൻസി സർവീസ് സംഘം മണിക്കൂറുകൾ നീണ്ട പരിശ്രമത്തിനൊടുവിലാണ് തീ പൂർണ്ണമായി അണച്ചത്.
തീ സമീപ കടകളിലേക്ക് പടരാതിരുന്നതിനാൽ വലിയ ദുരന്തം ഒഴിവായി. അപകടത്തിൽ ആർക്കും പരിക്കേൽക്കുകയോ മരണപ്പെടുകയോ ചെയ്തിട്ടില്ലെന്ന് അധികൃതർ വ്യക്തമാക്കി. തീപിടിത്തത്തിന്റെ കാരണം വ്യക്തമല്ല. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്.
