തിരുവനന്തപുരം: വ്യവസായ സംരംഭങ്ങൾക്ക് ഇനി പഞ്ചായത്തിന്റെ ലൈസൻസ് ആവശ്യമില്ലെന്നും രജിസ്ട്രേഷൻ മാത്രം മതിയെന്നും മന്ത്രി എംബി രാജേഷ് .സംരംഭകത്തെ പ്രോത്സാഹിപ്പിക്കുന്നതിനായാണ് തദ്ദേശ ചട്ടങ്ങളില് മാറ്റം വരുത്താനുള്ള തീരുമാനം. കെട്ടിട നിര്മ്മാണ ചട്ടത്തിലുള്പ്പെടെ ജനോപകാരപ്രദമായ നിരവധി മാറ്റങ്ങളാണ് വന്നുകൊണ്ടിരിക്കുന്നതെന്നും മന്ത്രി തിരുവനന്തപുരത്ത് വാര്ത്താസമ്മേളനത്തില് അറിയിച്ചു. കെട്ടിട നിര്മ്മാണ പെര്മ്മിറ്റ് ഫീസില് 60%വരെ കുറവ് വരുത്തുകയും ചെയ്തു.
കൂടാതെ ഈസ് ഓഫ് ഡൂയിംഗ് ബിസിനസിലെ കുതിപ്പിന് സുപ്രധാനമായ പങ്ക് വഹിക്കാന് കെ സ്മാര്ട്ടിന് കഴിയുമെന്നാണ് പ്രതീക്ഷിക്കുന്നതെന്നും മന്ത്രി പറഞ്ഞു. ഫാക്ടറികള് പോലെയുള്ള സംരംഭങ്ങളെ കാറ്റഗറി 1 വിഭാഗമായും വാണിജ്യ വ്യാപാര സേവന സംരംഭങ്ങളെ കാറ്റഗറി 2 വിഭാഗമായും തിരിക്കും. നിലവില് വീടുകളില് പ്രവര്ത്തിക്കുന്ന കുടില് വ്യവസായങ്ങള്ക്കും വീടുകളിലെ മറ്റ് വാണിജ്യ സേവന പ്രവര്ത്തനങ്ങള്ക്കും ലൈസന്സ് നല്കാന് വ്യവസ്ഥയില്ല. ചെറുകിട സംരംഭങ്ങള്ക്ക് ലൈസന്സില്ലാതെ പ്രവര്ത്തിക്കാനാണ് അനുവാദമുള്ളത്.
ഇത് സംരംഭങ്ങള്ക്ക് ബാങ്ക് ലോണ്, ജിഎസ്ടി രജിസ്ട്രേഷന് കിട്ടാനുള്പ്പെടെ ബുദ്ധിമുട്ട് സൃഷ്ടിക്കുന്നതായി പരാതികളുണ്ട്. ഇത് പരിഹരിക്കാന് പൊല്യൂഷന് കണ്ട്രോള് ബോര്ഡിന്റെ വൈറ്റ്, ഗ്രീന് കാറ്റഗറിയില് പെടുന്ന സംരംഭങ്ങള്ക്ക് കെട്ടിട നിര്മ്മാണ ചട്ടങ്ങള് പ്രകാരമുള്ള ഉപയോഗ ഗണം നോക്കാതെ വീടുകളിലുള്പ്പെടെ ലൈസന്സ് നല്കാന് വ്യവസ്ഥ കൊണ്ടുവരുമെന്ന് മന്ത്രി പറഞ്ഞു. വ്യവസായ മേഖലയില്പെട്ട കാറ്റഗറി 1 സംരംഭങ്ങള്ക്ക് പഞ്ചായത്തുകളുടെ ലൈസന്സിന് പകരം രജിസ്ട്രേഷന് മാത്രം മതിയാകുമെന്നും മന്ത്രി പറഞ്ഞു.
