കൊച്ചി: ഷൈന് ടോം ചാക്കോയുടെ കൊക്കെയ്ന് കേസിലെ വിചാരണക്കോടതി വിധിക്കെതിരെ അപ്പീല് നല്കാന് സര്ക്കാര്. എറണാകുളം അഡീഷണല് സെഷന്സ് കോടതി വിധിക്കെതിരെ ഹൈക്കോടതിയില് അപ്പീല് നല്കും. വിചാരണക്കോടതി ഉത്തരവ് പരിശോധിച്ച ശേഷം പ്രൊസിക്യൂഷന് തീരുമാനമെടുക്കും. ഡാന്സാഫ് ടീമിന്റെ ഹോട്ടൽ പരിശോധനക്കിടയിൽ ഹോട്ടൽ മുറിയിൽ നിന്ന് നടൻ ഇറങ്ങി ഓടിയതിന്റെ പശ്ചാത്തലത്തിലാണ് തീരുമാനം.
അന്വേഷണ സംഘത്തിന്റെ വീഴ്ചകള് വിചാരണക്കോടതി എണ്ണിപ്പറഞ്ഞിരുന്നു. നടപടിക്രമങ്ങള് പാലിച്ചല്ല അന്വേഷണം പൂര്ത്തിയാക്കിയതെന്ന് കോടതി വിമര്ശിച്ചു. നടനും സുഹൃത്തുക്കളും കൊക്കെയ്ന് ഉപയോഗിച്ചോ എന്ന് പോലീസ് പരിശോധിച്ചില്ലെന്നും പിടിച്ചെടുത്ത കൊക്കെയ്ന്റെ ഘടകങ്ങള് വേര്തിരിച്ച് പരിശോധിക്കാനോ സെര്ച്ച് മെമ്മോയില് രേഖപ്പെടുത്താനോ അന്വേഷണ സംഘം തയ്യാറായില്ലെന്നും കോടതി കുറ്റപ്പെടുത്തി. വനിതാ പ്രതികളെ പരിശോധിച്ചത് വനിതാ പോലീസ് ആയിരുന്നില്ലെന്നും കോടതി വ്യക്തമാക്കിയിരുന്നു.
2015 ജനുവരിയിലായിരുന്നു കൊക്കെയ്ന് കേസില് ഷൈന് ടോം ചാക്കോ അറസ്റ്റിലായത്. കടവന്ത്ര ഫ്ളാറ്റില് നിന്ന് ഷൈനും സുഹൃത്തുക്കളായ ബ്ലെസി സില്വസ്റ്റര്, രേഷ്മ രംഗസ്വാമി, ടിന്സി ബാബു, സ്നേഹ ബാബു എന്നിവരും പിടിയിലായി. ഫ്ളാറ്റിലെ ഫ്രിഡ്ജില് സൂക്ഷിച്ച നിലയില് പത്ത് പായ്ക്കറ്റ് കൊക്കെയ്ന് കണ്ടെത്തിയെന്നായിരുന്നു അന്വേഷണ ഉദ്യോഗസ്ഥര് അന്ന് പറഞ്ഞത്. കേരളത്തിലെ ആദ്യ കൊക്കെയ്ന് കേസായി ഇത് രജിസ്റ്റര് ചെയ്യപ്പെട്ടു.
