തൃശ്ശൂർ: ലക്ഷങ്ങൾ ചെലവഴിച്ച് ഗുരുവായൂർ നഗരസഭ വാങ്ങിയ രണ്ട് ലോറികൾ മൂന്ന് വർഷമായി ഉപയോഗിക്കാതെ കിടന്ന് നശിക്കുന്നു. 27 ലക്ഷം രൂപ ചെലവഴിച്ച് വാങ്ങിയ സീവേജ് ക്ലീനിങ് ലോറിയും 15 ലക്ഷം രൂപ മുടക്കി വാങ്ങിയ കുടിവെള്ള ടാങ്കർ ലോറിയുമാണ് ടൗൺഹാൾ വളപ്പിൽ തുരുമ്പെടുത്ത് നശിക്കുന്നത്.
അമൃത് പദ്ധതിയുടെ ഭാഗമായി വാങ്ങിയ സീവേജ് ക്ലീനിങ് ലോറി നഗരസഭാ പരിധിയിലെ വീടുകളിൽനിന്നും സ്ഥാപനങ്ങളിൽനിന്നും ശുചിമുറി മാലിന്യം ശേഖരിച്ച് ചക്കംകണ്ടം ട്രീറ്റ്മെന്റ് പ്ലാന്റിൽ എത്തിക്കുന്നതിനാണ് ഉപയോഗിക്കേണ്ടിയിരുന്നത്. എന്നാൽ പ്രദേശവാസികളുടെയും സിപിഐയുടെയും എതിർപ്പിനെ തുടർന്ന് പദ്ധതി നടപ്പാക്കാനായില്ല.
വാഹനം മറ്റ് തദ്ദേശ സ്ഥാപനങ്ങൾക്ക് കൈമാറാൻ അമൃത് അധികൃതർ നിർദേശിച്ചിരുന്നെങ്കിലും ലോറി ഉപയോഗിക്കുന്നുണ്ടെന്നാണ് നഗരസഭ റിപ്പോർട്ട് നൽകിയതെന്നാണ് വിവരം. കുടിവെള്ള വിതരണത്തിനായി വാങ്ങിയ 12,000 ലിറ്റർ ശേഷിയുള്ള ടാങ്കർ ലോറിയും ഉപയോഗിക്കുന്നില്ല. വലുപ്പം കൂടുതലായതിനാൽ ഇടുങ്ങിയ റോഡുകളിലൂടെ സഞ്ചരിക്കാൻ കഴിയാത്തതാണ് പ്രശ്നം. ഇതോടെ കുടിവെള്ള വിതരണം നടത്താൻ നഗരസഭ സ്വകാര്യ വാഹനങ്ങളെ വാടകയ്ക്ക് എടുക്കുകയാണ്. ഇതിനായി ലക്ഷക്കണക്കിന് രൂപ ചെലവഴിക്കേണ്ടിവരുന്നുണ്ട്.
42 ലക്ഷം രൂപ ചെലവഴിച്ച് വാങ്ങിയ വാഹനങ്ങൾ ഉപയോഗിക്കാതെ നശിക്കുന്നതിലൂടെ നഗരസഭയ്ക്ക് സാമ്പത്തിക നഷ്ടമുണ്ടായെന്നാണ് വിമർശനം. ഇതിന് ഉത്തരവാദികളായവർക്കെതിരെ നടപടി വേണമെന്ന ആവശ്യവും ശക്തമാണ്.
വിഷയത്തിൽ സംസ്ഥാന സർക്കാരിന് പരാതി നൽകുമെന്ന് മുസ്ലിം ലീഗ് ഗുരുവായൂർ ഈസ്റ്റ് കമ്മിറ്റി ജനറൽ സെക്രട്ടറി കെ. ജയപ്രകാശ് അറിയിച്ചു. വാഹനങ്ങൾ വീണ്ടും ഉപയോഗിക്കണമെങ്കിൽ അറ്റകുറ്റപ്പണികൾക്കായി ലക്ഷങ്ങൾ ചെലവഴിക്കേണ്ടിവരുമെന്നും ചൂണ്ടിക്കാണിക്കപ്പെടുന്നു.
