ന്യൂഡൽഹി: അമേരിക്കയിൽ ലൈംഗിക കുറ്റകൃത്യങ്ങളിൽ ശിക്ഷിക്കപ്പെട്ട ജെഫ്രി എപ്‌സ്റ്റീനുമൊത്ത് കേന്ദ്രമന്ത്രി ഹർദീപ് സിങ് പുരി കൂടിക്കാഴ്ച നടത്തുന്ന ചിത്രങ്ങൾ പുറത്തുവന്നതോടെ കേന്ദ്രസർക്കാരിനെതിരെ പ്രതിപക്ഷം രംഗത്ത്. കോൺഗ്രസ്, തൃണമൂൽ കോൺഗ്രസ്, എൻസിപി (ശരദ് പവാർ വിഭാഗം) തുടങ്ങിയ പാർട്ടികളുടെ നേതാക്കളാണ് മന്ത്രിയുടെ വിശദീകരണം ആവശ്യപ്പെട്ടത്.
എപ്‌സ്റ്റീനെ കണ്ടത് ഒരു ഔദ്യോഗിക പ്രതിനിധി സംഘത്തിന്റെ ഭാഗമായാണെന്ന ഹർദീപ് സിങ് പുരിയുടെ മുൻ വിശദീകരണത്തെയാണ് പ്രതിപക്ഷം ചോദ്യം ചെയ്യുന്നത്. പുറത്തുവന്ന ചിത്രങ്ങളിൽ കൂടിക്കാഴ്ചയുടെ സാഹചര്യം വ്യക്തമാക്കണമെന്നും മന്ത്രി മറുപടി നൽകണമെന്നും നേതാക്കൾ ആവശ്യപ്പെട്ടു.
കോൺഗ്രസ് വക്താവ് സുപ്രിയ ശ്രീനാഥെ മന്ത്രിയുടെ വിശദീകരണത്തെ വിമർശിച്ചു. പ്രധാനമന്ത്രി നരേന്ദ്ര മോദിയുടെ അടുത്തുള്ളവർ ആരാണെന്നതിനെക്കുറിച്ച് ചോദ്യങ്ങൾ ഉയർത്തിയ അവർ, വിഷയത്തിൽ കേന്ദ്രമന്ത്രി വ്യക്തത വരുത്തണമെന്നും ആവശ്യപ്പെട്ടു.
തൃണമൂൽ കോൺഗ്രസ് എംപി മഹുവ മൊയ്ത്രയും ചിത്രങ്ങളെ പരിഹസിച്ച് രംഗത്തെത്തി. പ്രതിനിധി സംഘത്തിന്റെ ഭാഗമായാണ് കൂടിക്കാഴ്ച നടത്തിയതെങ്കിൽ ചിത്രങ്ങളിൽ മറ്റ് പ്രതിനിധികൾ എവിടെയാണെന്നായിരുന്നു അവരുടെ ചോദ്യം. ചിത്രങ്ങൾ ഗൗരവമുള്ളതാണെന്നും മന്ത്രി നിലപാട് വ്യക്തമാക്കണമെന്നും എൻസിപി (എസ്.പി) വക്താവ് അനീഷ് ഗവാണ്ടെയും ആവശ്യപ്പെട്ടു.
അതേസമയം, കൂടിക്കാഴ്ചകൾ ഔദ്യോഗിക ആവശ്യങ്ങൾക്കായിരുന്നുവെന്നാണ് ഹർദീപ് സിങ് പുരിയുടെ വിശദീകരണം. ഇന്റർനാഷണൽ പീസ് ഇൻസ്റ്റിറ്റ്യൂട്ടിന്റെ കീഴിലുള്ള ഇൻഡിപെൻഡന്റ് കമ്മീഷൻ ഓൺ മൾട്ടിലാറ്ററലിസത്തിന്റെ പ്രതിനിധി സംഘത്തിന്റെ ഭാഗമായാണ് എപ്‌സ്റ്റീനെ കണ്ടതെന്ന് അദ്ദേഹം വ്യക്തമാക്കി.
മൂന്നോ നാലോ തവണ എപ്‌സ്റ്റീനെ കണ്ടിട്ടുണ്ടെന്നും 2017ൽ കേന്ദ്രമന്ത്രിയാകുന്നതിന് മുമ്പായിരുന്നു ഈ കൂടിക്കാഴ്ചകളെന്നും പുരി പറഞ്ഞു. ഐക്യരാഷ്ട്രസഭയിലെ ഇന്ത്യയുടെ അംബാസഡർ സ്ഥാനം രാജിവച്ച ശേഷമാണ് കൂടിക്കാഴ്ചകൾ നടന്നതെന്നും അദ്ദേഹം വിശദീകരിച്ചു.
ഇന്റർനാഷണൽ പീസ് ഇൻസ്റ്റിറ്റ്യൂട്ടിലെ തന്റെ മുൻ മേധാവി ടെർജെ റോഡ്-ലാർസൻ വഴിയാണ് എപ്‌സ്റ്റീനെ പരിചയപ്പെട്ടതെന്നും മന്ത്രി വ്യക്തമാക്കിയിട്ടുണ്ട്. കൂടിക്കാഴ്ചകൾക്ക് എപ്‌സ്റ്റീനെതിരായ കുറ്റകൃത്യങ്ങളുമായി ബന്ധമില്ലെന്നും അദ്ദേഹം പറഞ്ഞു. ചിത്രങ്ങൾ പുറത്തുവന്നതോടെ വിഷയത്തിൽ രാഷ്ട്രീയ വിവാദം ശക്തമായിരിക്കുകയാണ്.
