ന്യൂഡല്ഹി: ഡൽഹിയിലും സമീപപ്രദേശങ്ങളിലും കനത്തമഴ. ചൊവ്വാഴ്ച പെയ്ത കനത്തമഴയെത്തുടര്ന്ന് നഗരത്തിന്റെ പലഭാഗങ്ങളിലും വെള്ളക്കെട്ടുകളുണ്ടായി. ചൊവ്വാഴ്ച രാവിലെ മുതല് തുടരുന്ന മഴ വിമാനസര്വീസുകളെ ബാധിച്ചേക്കാമെന്ന് വിമാനക്കമ്പനികൾ മുന്നറിയിപ്പ് നല്കിയിട്ടുണ്ട്.
ശക്തമായ മഴ തുടരുന്നത് വിമാന സര്വീസുകളെ ബാധിച്ചേക്കാമെന്നും ഡല്ഹി വിമാനത്താവളത്തില്നിന്ന് യാത്രചെയ്യേണ്ടവര് വിമാനത്താവളത്തിലേക്ക് പുറപ്പെടും മുന്പ് ഫ്ളൈറ്റ് സ്റ്റാറ്റസ് പരിശോധിക്കണമെന്നും എയര് ഇന്ത്യ അറിയിച്ചു. മഴമൂലം ഗതാഗത തടസ്സമുണ്ടാകാൻ സാധ്യതയുള്ളതിനാൽ യാത്രക്കാര് അതനുസരിച്ച് യാത്ര ആസൂത്രണംചെയ്യണമെന്ന് ഇന്ഡിഗോയും നിര്ദേശം നല്കി.
പ്രതികൂല കാലാവസ്ഥ കാരണം ഡല്ഹിയില് എത്തിച്ചേരുന്നതും പുറപ്പെടുന്നതുമായ വിമാനങ്ങൾ വൈകിയേക്കാമെന്നും യാത്രക്കാര് ഫ്ളൈറ്റ് സ്റ്റാറ്റസ് പരിശോധിക്കണമെന്നും സ്പൈസ് ജെറ്റും അറിയിച്ചു. ഡല്ഹിക്ക് പുറമേ ഹരിയാനയിലെ സോനിപത്, ഛര്ഖി ദാദ്രി, ഫറൂഖ്നഗര്, സോഹ്നാ, രേവാരി, നൂഹ് എന്നിവിടങ്ങളിലും ഉത്തര്പ്രദേശിലെ നോയിഡ, സകോഡി ടണ്ട എന്നിവിടങ്ങളിലും ചൊവ്വാഴ്ച മഴ ലഭിക്കുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ് നല്കിയിട്ടുണ്ട്.
