പാലക്കാട്: രാഹുല് മാങ്കൂട്ടത്തില് എംഎല്എയോടൊപ്പം വേദി പങ്കിട്ട സംഭവത്തില് ബിജെപി ചെയര്പേഴ്സണ് പ്രമീള ശശിധരന് പ്രതിസന്ധിയില്. സംഭവത്തില് ഇരു നിലപാടെടുത്ത് നേതാക്കള്.
വിഷയത്തില് നടപടിയെ കുറിച്ച് തീരുമാനം എടുക്കാന് ഉച്ചയ്ക്ക് ജില്ലാ കമ്മറ്റി യോഗം ചേരും. അതേസമയം സംഭവത്തില് മുതിര്ന്ന നേതാക്കള് പ്രാഥമിക വിവരങ്ങള് തേടി.
എന്നാല് പറയാനുള്ള കാര്യങ്ങള് സംസ്ഥാന നേതൃത്വത്തോട് പറയുമെന്ന നിലപാടിലുറച്ച് പ്രമീള ശശിധരന്.
എന്നാല് ചെയര്പേഴ്സണെ തള്ളാതെയാണ് മുതിര്ന്ന ബിജെപി നേതാവ് എന് ശിവരാജന്റെ പ്രതികരണം.
ചെയര് പേഴ്സണ് എന്ന നിലയ്ക്ക് പോയതാണെന്നും രാഹുല് വരുന്ന കാര്യം ചെയര്പേഴ്സണ് അറിഞ്ഞില്ലെന്നും ശിവരാജന് പറഞ്ഞു.
ജനാധിപത്യ പാര്ട്ടിയാണ് അതിനാല് അഭിപ്രായ വ്യത്യാസം ഉണ്ടാകുമെന്നും ശിവരാജന് പറഞ്ഞു.
ഇന്നലെ പാലക്കാട് നഗരത്തിലെ സ്റ്റേഡിയം ബൈപാസ് റോഡ് ഉദ്ഘാടന പരിപാടിയിലാണ് രാഹുല് മാങ്കൂട്ടത്തില് എംഎല്എക്കൊപ്പം പാലക്കാട് നഗരസഭ ചെയര്പേഴ്സണ് പ്രമീള ശശിധരനും പങ്കെടുത്തത്.
രാഹുലിനെ പൊതു പരിപാടിയില് പങ്കെടുപ്പിക്കില്ലെന്നായിരുന്നു ബിജെപിയുടെ നിലപാട്. യുവതികളുടെ ആരോപണങ്ങളുടെ പശ്ചാത്തലത്തില് രാഹുല് മാങ്കൂട്ടത്തില് എംഎല്എ പരിപാടികളില് നിന്നും വിട്ടുനിന്നിരുന്നു.
പിന്നീട് കെഎസ്ആര്ടിസി ബസ്സിന്റെ ഉദ്ഘാടനത്തിനും റോഡ് ഉദ്ഘാടനത്തിനും എംഎല്എ പങ്കെടുത്തിരുന്നു. എന്നാല് എംഎല്എയെ തടയുമെന്ന നിലപാടിലായിരുന്നു ബിജെപിയും സിപിഎമ്മും.
