ടൊറന്റോ: കാനഡയിലെ മിസിസാഗയിൽ വനിതാ ഡോക്ടർമാർക്കും വനിതാ ജീവനക്കാർക്കും മുന്നിൽ നഗ്നതാപ്രദർശനം നടത്തിയെന്ന പരാതിയിൽ ഇന്ത്യൻ വംശജനായ വൈഭവ് അറസ്റ്റിൽ. നിരവധി ക്ലിനിക്കുകളിലാണ് ഇയാൾ ഇത്തരം അസഭ്യപ്രവർത്തനങ്ങൾ നടത്തിയതെന്ന് പീൽ റീജിയണൽ പൊലീസ് അറിയിച്ചു.
ആരോഗ്യപ്രശ്നങ്ങൾ നടിച്ച് വിവിധ ക്ലിനിക്കുകളിൽ എത്തിച്ചേരുകയും, വനിതാ ഡോക്ടർമാരെ അനുചിതമായി സ്പർശിക്കാൻ ശ്രമിച്ചിരിക്കാമെന്ന സംശയവും പൊലീസ് ഉന്നയിച്ചു. ഈ വർഷം പല മാസങ്ങളിലായി നിരവധി കേന്ദ്രങ്ങളിൽ ഇയാൾ എത്തിയതായി ക്രിമിനൽ ഇൻവെസ്റ്റിഗേഷൻസ് ബ്യൂറോ കണ്ടെത്തി.
ചില ഇടങ്ങളിൽ ‘ആകാശ്ദീപ് സിംഗ്’ എന്ന വ്യാജനാമം ഉപയോഗിച്ചാണ് ഇയാൾ എത്തിയത്. ഡിസംബർ 4ന് വൈഭവിനെ അറസ്റ്റ് ചെയ്തതായി പൊലീസ് അറിയിച്ചു. ജാമ്യാപേക്ഷയിൽ ഇതുവരെ വാദം നടന്നിട്ടില്ല, ഇയാൾ പൊലീസ് കസ്റ്റഡിയിലാണ്.
