പാലക്കാട്: മങ്കര ജിഎച്ച്എസ്എസ് സ്കൂളിലെ വിദ്യാർത്ഥികളുമായി നടത്തിയ ‘ഇൻസ്പയർ വെനസ് ഡേ’ പരിപാടി വലിയൊരു ഊർജ്ജം സമ്മാനിച്ചതായി ജില്ലാ കളക്ടർ മാധവിക്കുട്ടി എം.എസ് (ഐ.എ.എസ്) പറഞ്ഞു. എട്ട്, ഒൻപത്, പത്ത് ക്ലാസുകളിലെ വിദ്യാർത്ഥികളാണ് ഇന്ന് കളക്ടറുടെ ചേംബറിൽ എത്തിയത്.
വായനാശീലം വളർത്തുന്നതിന്റെയും ഡിജിറ്റൽ ലോകം മുന്നോട്ട് വെക്കുന്ന വെല്ലുവിളികളുടെയും പ്രാധാന്യം ചർച്ചയായ വേദിയിൽ, സിവിൽ സർവീസിനെയും ഭരണഘടനാ മൂല്യങ്ങളെയും കുറിച്ചുള്ള കുട്ടികളുടെ ആവേശകരമായ ചോദ്യങ്ങൾ പരിപാടിയെ ശ്രദ്ധേയമാക്കി. ഭരണഘടനാപരമായ ബോധവും പൊതുജനസേവന മേഖലയോടുള്ള ആകാംക്ഷയും വിദ്യാർത്ഥികളിൽ വർധിപ്പിക്കേണ്ടതിന്റെ ആവശ്യകതയും കളക്ടർ പങ്കുവെച്ചു.
സോഷ്യൽ മീഡിയയുടെ ഉത്തരവാദിത്തപരമായ ഉപയോഗത്തെക്കുറിച്ച് അധ്യാപകരുമായും രക്ഷിതാക്കളുമായും സംവദിക്കേണ്ടതിന്റെ പ്രാധാന്യവും പരിപാടിയിൽ ഉന്നയിച്ചു. ഡിജിറ്റൽ കാലഘട്ടത്തിൽ വിദ്യാർത്ഥികൾ ജാഗ്രതയോടെയും ഉത്തരവാദിത്തത്തോടെയും സാങ്കേതികവിദ്യ ഉപയോഗിക്കണമെന്ന് കളക്ടർ നിർദേശിച്ചു.
നാളെയുടെ വാഗ്ദാനങ്ങളായ കുട്ടികളുടെ സ്വപ്നങ്ങൾക്കും ലക്ഷ്യങ്ങൾക്കും എല്ലാവിധ ആശംസകളും ജില്ലാ കളക്ടർ അറിയിച്ചു. വിദ്യാർത്ഥികളിൽ ആത്മവിശ്വാസവും ലക്ഷ്യബോധവും വളർത്തുന്ന ഇത്തരത്തിലുള്ള സംവാദങ്ങൾ തുടർന്നും സംഘടിപ്പിക്കുമെന്ന് ബന്ധപ്പെട്ടവർ അറിയിച്ചു.
