ന്യൂയോര്ക്ക്: ഇറാന് ഭരണകൂടത്തിന് വേണ്ടി ആയുധ ഇടപാടുകള് നടത്തിയെന്നാരോപിച്ച് അമേരിക്കയിലെ സ്ഥിരം താമസക്കാരിയായ ഇറാനിയന് വംശജയെ അറസ്റ്റ് ചെയ്തു. ശനിയാഴ്ച രാത്രി ലോസ് ഏഞ്ചല്സ് അന്താരാഷ്ട്ര വിമാനത്താവളത്തില് വെച്ചാണ് ഷമീം മാഫി (44)യെ അറസ്റ്റ് ചെയ്തത്. സുഡാനിലെ ആഭ്യന്തര യുദ്ധത്തിലേക്കായി ആയുധങ്ങള് എത്തിച്ചുകൊടുക്കുന്നതില് ഇവര് ഇടനിലക്കാരിയായി പ്രവര്ത്തിച്ചു എന്നാണ് റിപ്പോര്ട്ട്.
‘അറ്റ്ലസ് ഇന്റര്നാഷണല് ബിസിനസ്’ എന്ന പേരില് ഒമാനില് രജിസ്റ്റര് ചെയ്ത വ്യാജ കമ്പനി വഴിയാണ് ഇവര് ഇടപാടുകള് നടത്തിയിരുന്നത്. ഇറാനിയന് മിലിട്ടറി ഗ്രേഡ് ഡ്രോണുകളായ മൊഹാജെര്-6 വാങ്ങുന്നതിനായി 7 കോടി ഡോളറിലധികം മൂല്യമുള്ള കരാറില് ഇവര് ഏര്പ്പെട്ടതായി പ്രോസിക്യൂട്ടര്മാര് ആരോപിച്ചു. കൂടാതെ 55,000 ബോംബ് ഫ്യൂസുകള് സുഡാന് പ്രതിരോധ മന്ത്രാലയത്തിന് എത്തിച്ചതായും ആരോപണമുണ്ട്.
