ന്യൂഡല്ഹി: വസതിയില് നിന്ന് പണം കണ്ടെത്തിയ സംഭവത്തില് ജസ്റ്റിസ് യശ്വന്ത് വര്മ്മ കുറ്റക്കാരനെന്ന്് ആഭ്യന്തര സമിതി റിപ്പോര്ട്ട്. ആരോപണത്തെക്കുറിച്ച് അന്വേഷിക്കാന് രൂപീകരിച്ച ആഭ്യന്തര സമിതി ചീഫ് ജസ്റ്റിസ് സഞ്ചീവ് ഖന്നയ്ക്ക് സമര്പ്പിച്ച റിപ്പോര്ട്ടിലാണ് കണ്ടെത്തല്. റിപ്പോര്ട്ടിന്റെ അടിസ്ഥാനത്തില് ജസ്റ്റിസ് യശ്വന്ത് വര്മ്മ രാജി വയ്ക്കേണ്ടതായി വരും. രാജിവെക്കാന് തയ്യാറായില്ലെങ്കില് റിപ്പോര്ട്ട് രാഷ്ട്രപതിക്ക് സമര്പ്പിക്കുകയും ജസ്റ്റിസിനെ ഇമ്പീച്ച് ചെയ്യാന് നിര്ദ്ദേശം നല്കുകയും ചെയ്യും. മാര്ച്ച് 25ന് അന്വേഷണം ആരംഭിച്ച സമിതി മെയ് നാലിനാണ് ചീഫ് ജസ്റ്റിസിന് റിപ്പോര്ട്ട് സമര്പ്പിച്ചത്.
പഞ്ചാബ്, ഹരിയാന ഹൈക്കോടതി ചീഫ് ജസ്റ്റിസ് ഷീല് നാഗു, ഹിമാചല് പ്രദേശ് ഹൈക്കോടതി ചീഫ് ജസ്റ്റിസ് ജി.എസ്. സന്ധവാലിയ, കര്ണാടക ഹൈക്കോടതി ജസ്റ്റിസ് അനു ശിവരാമന് എന്നിവരടങ്ങുന്ന മൂന്നംഗ സമിതിയാണ് റിപ്പോര്ട്ട് ചീഫ് ജസ്റ്റിസിന് സമര്പ്പിച്ചത്. ദില്ലി പോലീസ് കമ്മീഷണര് സഞ്ജയ് അറോറ, ദില്ലി ഫയര് സര്വീസ് മേധാവി എന്നിവരുള്പ്പെടെ 50 ലധികം പേരുടെ മൊഴികള് അന്വേഷണ സമിതി രേഖപ്പെടുത്തി.
ഹോളി ദിനത്തില് ജഡ്ജി യശ്വന്ത് വര്മ്മയുടെ ഔദ്യോഗിക വസതിയിലുണ്ടായ തീപിടിത്തം അണയ്ക്കാന് എത്തിയ ഫയര്ഫോഴ്സ് ഉദ്യോഗസ്ഥരാണ് 15 കോടി രൂപ കണ്ടെത്തിയതെന്നായിരുന്നു ആദ്യം പുറത്തു വന്ന റിപ്പോര്ട്ട്. വാര്ത്ത വലിയ ചര്ച്ചയായതോടെ ജഡ്ജിയുടെ വസതിയില് നിന്ന് ഫയര്ഫോഴ്സ് പണം കണ്ടെത്തിയിട്ടില്ലെന്നും15 മിനിറ്റിനുള്ളില് തീയണച്ചുവെന്നും സ്റ്റേഷനറി സാധനങ്ങള്ക്കാണ് തീപിടിച്ചതെന്നും വിശദീകരിച്ച് ഫയര്ഫോഴ്സ് മേധാവി അതുല് ഗാര്ഗ് രംഗത്ത് വന്നിരുന്നു.
എന്നാല് യശ്വന്ത് വര്മ്മയുടെ വീട്ടില് പണം നിറച്ച ചാക്കുകള് ഉണ്ടായിരുന്നെന്ന് ദില്ലി പൊലീസ്, അഗ്നിശമന സേന എന്നിവയിലെ അംഗങ്ങള് പിന്നീട് മൊഴി നല്കിയിരുന്നു.ഇതാണ് സംഭവത്തില് വഴിത്തിരിവായത്. തുടര്ന്നാണ് സംഭവത്തില് സുപ്രിംകോടതി അന്വേഷണത്തിന് ആഭ്യന്തര സമിതിയെ നിയോഗിച്ചത്. സംഭവത്തെ തുടര്ന്ന് ജസ്റ്റിസ് യശ്വന്ത് വര്മ്മയെ അലഹബാദ് ഹൈക്കോടതിയിലേക്ക് സ്ഥലം മാറ്റുകയും ചെയ്തിരുന്നു. ജഡ്ജിയുടെ വീട്ടില് കണക്കില്പ്പെടാത്ത പണമുണ്ടായിരുന്നു എന്നാണ് ആഭ്യന്ത സമിതിയുടെ റിപ്പോര്ട്ടിലുള്ളത്.
